Washington, Iaiong:
U President jong ka America, Donald Trump, u la pynbna shen u lah ban leit jngoh sha Saudi Arabia mynta u bnai kaba lah ban long ka jingleit jngoh shabar ri kaba nyngkong eh naduh ba u la wanphai biang ha ka bor synshar.
Haba pynbna ia kane, u Trump u la ong ba katei ka jingleit jngoh jong u ka lah ban long ha une u bnai lane kham hadien ruh. Hynrei un sa leit sha Qatar ruh bad kumjuh un sa leit ban jngoh sha ar tylli kiwei pat ki ri. Namar ka UAE ka long kaba kongsan bha, kumta lehse kin lah ban sangeh noh ha UAE bad Qatar.
U la ong ba ki heh jong ka Saudi ki la mynjur ban pynlut haduh shi klur tyngka ha ki kompeni jong ka America bad kane ka long ka jingmyntoi kaba khraw ia ki paidbah ka America bad khamtam eh ia ka sorkar ba kan lah ban kyntiew ia ka jinglong-jingman bad ban pynbit- pynbiang ia ka ri ha kiba bun ki liang.
Nangta pat u la ong ba ki kompeni jong ka US kin ioh ban shna ïa ki tiar na ka bynta ka Saudi Arabia bad kiwei kiwei ki jaka ha Middle East. Dei na kane ka daw kaba la pynlong ia u ba un kwah ban leit jngoh sha kitei ki ri na ka bynta ka jingiatreilang kaba ïaid beit-ïaid ryntih.
Ha u bnai Kyllalyngkot, u Crown Prince jong ka Saudi, Mohammed bin Salman, u la kular ban lum $600 billion ha liang ka khaïi pateng bad ka jingbei tyngka jong ka US.
Ki khubor jong ki kot khubor jong ka Saudi ha katei ka por kim shym la ai jingtip bniah shaphang ka tynrai jong katei ka pisa, kaba pyni palat shiteng na ka GDP jong ka Saudi, lane kumno la khmih lynti ba yn pyndonkam ia ka.
Ka jingleit jngoh kaba nyngkong eh jong u Trump kum president ha u snem 2017 ka dei sha Saudi Arabia.
U la thaw ïa ka jingïadei kaba jan bad ka Riyadh ha ka samoi treikam ba nyngkong jong u bad la khmih lynti ba un pynkhih ïa ka Saudi Arabia, ka jaka ba don ki jaka ba kyntang tam jong ka niam Islam, sha ka jingpynbeit ryntih ïa ka jingïadei bad ka Israel kum ka jingthmu ba kongsan jong ki kyndon ‘polisi’ bar ri.
