Shillong, Ïaïong 02
Ka International Cricket Council (ICC) ka la pyllait ïa ka thup kyrdan jong ki rangïalehkai kawang bol jong ka T20 bad u Varun Chakravarthy jong ka ri India u la shah pynhiar noh na ka kyrdan ba nyngkong na ka bynta ban wan ba-lai.
Wat hapdeng ki jingïalehkai ba itynnad jong u, u Chakravarthy u la wan hadien ïa u Jacob Duffy jong ka ka New Zealand uba bat ïa ka kyrdan ba ha khlieh duh bad u Akeal Hosein ka West Indies uba bat ïa ka kyrdan ba ar.
Kumba ka paw mynta ka India ka la don ha ka thup shiphew jong ki nongkawang bol. U Ravi Bishnoi kum leg-spinner bad u Arshdeep Singh, ki la bat ïa ka kyrdan kaba hynñiew bad shiphew, katba u Axar Patel u don ha ka kyrdan kaba khatlai.
Ha ka kyrdan jong ki nongtied, u Abhishek Sharma, u dang ïai bteng ban bat ïa ka kyrdan kaba ar, kata hadien ïa u Travis Head nongïalehkai jong ka Australia uba lamkhmat ha kane ka thup jong ki nongtied.
U Phil Salt jong ka England u bat ïa ka kyrdan kaba lai, katba ar ngut kiwei pat ki rangïalehkai ka India, u Tilak Varma bad u Suryakumar Yadav ki don ha ka kyrdan kaba saw bad san.
U Hardik Pandya kum rangïalehkai ha baroh ki liang (all-rounder) jong ka India, u la bat ïa ka kyrdan ba ha khlieh duh ha kane ka liang da kaba ïoh 252 points. Hadien jong u la bud sa u Dipendra Singh Airee na Nepal bad u Marcus Stoinis na Australia.
Ka jingpynbeit kyrdan jong ka ICC ka long katkum ka jingbishar bniah ïa ka jingïalehkai jong ki nongïalehkai ha kylleng ki jingïalehkai bad ki jingïalehkai bapher bapher jong ka T20 international.
Kine ki jingpynbeit kyrdan ki long kum ka nongrim ban bishar bniah ïa ka jinglah jong ki nongïalehkai kriket mynta ha kylleng ka pyrthei, kaba ai ïa ki jingshem kiba kordor shaphang jong ki ha kane ka jingïalehkai.
