New Delhi, ïaïong:
U Myntri Rangbahduh ka ri u Narendra Modi, u la leit jngoh ïa ka tnad treikam jong ka Rashtriya Swayamsevak Sangh (RSS) kaba la long ka sien kaba nyngkong eh jong u ban leit sha katei ka jaka ai jinghikai kaba don ha Nagpur, hadien ba u la long Myntri Rangbahduh ha ki 11 snem ba la leit.
Kane ka jingleit jngoh ka long hadien katto katne bnai ba la mih ki khubor ba don ka jingïakynad hapdeng ka seng kaba bat ïa ka jingsynshar Bharatiya Janata Party bad ka RSS, ka seng kmie ba don jingmut jong ka.
U Modi, u la leit jngoh ïa u mot sah kynmaw jong u nongseng jong ka RSS, u Keshav Baliram Hedgewar, ha kaba la synran lang da u heh duh jong ka RSS, u Mohan Bhagwat, bad u la ai burom da ki syntiew.
U la buh ruh ïa u mawnongrim jong ka Madhav Netralaya Premium Centre, ka jingtei ba thymmai jong ka Madhav Netralaya Eye Institute & Research Centre, kaba la ai kyrteng ha ka kyrteng jong u heh ka RSS ba la khlad noh u Madhavrao Golwalkar.
Haba kren ha katei ka jingïalang, u Modi u la ïaroh ïa ka Sangh, da kaba khot ïa ka kum u ‘dieng Banyan’ jong ka kolshor bymjukut jong ka ri India. U la ong ba ka RSS ka ai ka jingpynïaid kaba shai sha ka jingthmu jong ka jingim.
“Ki Volunteer jong ka RSS ki trei khlem da len lade ha ki bynta bapher bapher ha ki bynta bapher bapher jong ka ri. Kane ka Vatvruksh kaba heh kam dei kaba rit paid. Ka RSS ka long ïaryngkat bad ka kam shakri”, u la ong.
Hadien ka jingwan jngoh jong u ïa ka jaka treikam jong ka RSS, u Modi u la leit jngoh ïa ka Deekshabhoomi ha Nagpur, ha kaba u Dr B R Ambedkar u la pdiang ïa ka niam Buddhist.
Hadien katei ka sngi, u Modi, u la leit sha Chhattisgarh, ha kaba u la buh ïa u maw nongrim bad plie ïa ki project halor ki kam pynroi kiba shongdor palat T.33,700 klur kiba ïadei bad ki bynta bapher bapher.
