Jowai, Ïaïong 02
Ka West Jaiñtia District Badminton Association kan pynlong ïa ka lympung ïalehkai ba la tip kum ka 18th Inter School Badminton Championship 2025 ka ban sdang naduh ka 8 haduh 11 tarik mynta u bnai ha Jowai.
Kane ka lympung ïalehkai kan sdang naduh ka por 9 baje mynstep haduh 5 baje janmiet ha Kiang Nangbah Indoor Hall Stadium. Ki kyrdan ïalehkai ki long Under- 13, Under-15, Under-17 (single bad double) jong ki kynthei bad shynrang.
Ka tarik khatduh ban pynpoi ïa ki kyrteng kan long ha ka 4 tarik mynta u bnai hapoh ka por 4:30 janmiet. Ki kot ba donkam ki long ka birth certificate lane Aadhar card jong ki khynnah ba ïashim bynta. Ki khynnah ïalehkai ki lah ban shim bynta tang ar tylli, (kata kawei ha ka single bad kawei ka Doubles) bad ïa ki jingtip ba kham bniah ki lah ban phone ïa u Bah T. Laloo (9366115391) lane ha u H. Bareh (9436115084). Te kumta ka synjuk ka khot bad wer ïa ki skul ba don hapoh ka West Jaiñtia District ba kin wan ïashim bynta ha kane ka lympung ïalehkai badminton.
