New Delhi, ïaïong:
U nongïalam ka liang pyrshah ha Rajya Sabha, u Mallikarjun Kharge, ha ka sngi Palei, u la ong ba ki jingkynnoh klun ïa ki jaka khlaw ba la buh pyrshah ïa u da u Anurag Thakur ha Lok Sabha ki long ki bym don nongrim, da kaba ong ba kitei ki jingkren ki pynsniew bad pynthohbria ïa ka nam jong u namar ba u la kob ïa u MP ka BJP ban pynshisha ïa ki bad lada ka long kumta un iehnohkam.
Haba wanrah ïa kane ka mat ha ka kynta kylli jingkylli ha Rajya Sabha, u President ka Congress u la ong ba u MP ka BJP u la hap ban weng noh ïa ki jingkren pynjah burom jong u kiba la kren ha ka por ba ïatai halor ka Waqf Bill ha Lower House.
“Hynrei la dep ban pynjulor”, la ong u Kharge. U la pan map ruh na u Thakur bad kumjuh ruh na u nongïalam ka ïingdorbar ha Rajya Sabbha, u J P Nadda, halor katei ka mat.
Ha ka sngi Balang, u Thakur u la thombor ïa ka Congress ha Lok Sabha namar ka jingpyrshah ïa ka aiñ Waqf (Amendment) Bill, 2025. U la ong ba kane ka aiñ ba la tyrwa kan dei u prek bakhatduh ban sah ha ka synduk ïap halor ka “politik pynsuk” jong ka Congress. U la pynngat ruh ïa ka jingkynnoh pyrshah ïa u Kharge da kaba kynnoh ba u la kurup jaka khlem jingbit.
“Hynnin ka sngi (sngi Balang) u Anurag Thakur, u la pynngat ïa nga da ki jingkynnoh kiba lamler bad ki bym don nongrim ha Lok Sabha. Haba ki paralok jong nga ki la tuklar ïa u, u la hap ban weng noh ïa ki jingkren pynjah burom jong u. Hynrei la dep ban pynjulor,'” la ong u Kharge.
Hynrei u heh ka Congress u la ong ba wat lada la weng noh ïa ki jingkren, hynrei kumjuh ruh ki jingïai bteng ha rynsan jong ki Media bad Social Media.
“Nga shah pynbor ban ïeng mynta ka sngi bad ban pynrem ïa ki jingkynnoh bym don nongrim jong u Anurag Thakur. Nga khmih lynti ïa ka jingpanmap na u nong-ialam ka ïingdorbar, kaba long kaba duna tam kaba ka seng ba bat ïa ka jingsynshar ka lah bad ka dei ban leh,” la ong u Kharge.
U la bynrap ruh ba lada u Thakhur um lah ban pynshisha ïa ki jingkynnoh jong u, “um don hok ban don ha Parliament. U dei ban iehnoh kam. Lada pynshisha ïa ki jingkynnoh, ngan iehnoh ïa ka kam,” la ong u Kharge. Ki dkhot ka liang pyrshah ki la pynlong ïa ka jingïaid paidbah tang hadien ba u Kharge u la ai jingkren.
