Shillong, Ïaïong 04
Ïa ka jingïakop ñiah saikil ba la tip kum ka 5th Assam Downhill Championship 2025 yn pynlong ha ka 6 tarik mynta u bnai ha Monkey Temple Trail, Bortila Hills kaba ha ka nongbah Guwahati.
Yn pynïaid ïa kane da ka Spokehub Racing ha kaba kane ka jingïalehkai ñiah saikil ka long kaba paw ha kylleng jong ri India.
Da ka jinglah ban pynlong haduh hynñiew snem, ka Assam Downhill Championship ka la kylla long kawei na ki jingïakop ba heh (downhill MTB competition) na ka bynta ban sei ïa ki sap ba kyrpang ki ban lah ban paw wat haduh ki jingïakop bar ri.
Ha ki snem ba la leit la pdiang sngewbha ïa ki nongñiah saikil na Bhutan kiba la lah ban pynskhem ïa ka nam jong ka ADC ha ka thaiñ. “Ka ADC ka dei kawei na ki jingïakop ñiah saikil hapoh ri India. Ngi sngew sarong ban thaw ïa ka rynsan kaba pynroi ïa ki sap ba paw ha ka pyrthei bad ngim lah khlem da ai khublei ïa ki nongkyrshan,” ong u Bikash Doley, u nongseng jong ka Spokehub Racing.
“Kane kam dei tang ka jingïamareh – ka dei ka jingrakhe ïa ka jinglah jong u briew pyrshah ïa ki jingeh. Te kumta ngi khot sngewbha ïa baroh ban sakhi da ka jingkmen bad ban ai mynsiem ïa kine ki nongïalehkai,” ong u Arshel Akhter, Bicycle Mayor jong ka Guwahati & uba long u nongseng ïa ka Pedal for a Change.
