Shillong, Ïaïong 04
Ka Super Cup ka lah ban don tang hapoh 16 tylli ki kynhun bad ar tylli ki klob I-League kiba la pynthikna ban shim bynta ha katei ka lympung kaba la thmu ban sa long shen mynta u bnai ha Odisha.
Ha kane ka lympung ka ban pynïaid da ka All India Football Federation (AIFF), la kynthup ïa ka jingïashim bynta na baroh ki kynhun ïalehkai jong ka Indian Super League (ISL) bad ki kynhun ba la jied na ka I-League. Mynta ka samoi, ka AIFF ka la pynbna ba “13 tylli ki klob ISL bad lai tylli ki klob I-League kin ïashim bynta ha ka sien kaba san jong kane ka lympung.”
Katkum ki tyllong khubor ba la ïoh lum, la ong ba ka AIFF ka la thoh sha baroh ki klob I-League bad la bthah ïa ki ba kin pynrung kyrteng ïa ka jingthmu jong ki ban ïashim bynta ha ka Super Cup. Lada palat ïa lai tylli ki klob ki pyni ïa ka jingangnud, ka jingthmu ka long ban pynlong ïa ka jingïalehkai ïaknieh rung shwa ban jam sha ka wat ba khatduh.
Hynrei kumba ka long tang mynta tang ar tylli ki klob ïalehkai I-League kata ka Churchill Brothers bad ka Inter Kashi kiba la pynthikna ban shim bynta, kaba la pynlong ïa ka AIFF ban shna ïa ka prokram ïalehkai ha kaba ka Mohun Bagan Super Giant kaba la jop ha ka ISL, kan ïoh jaka lypa sha ka pre-quarterfinal.
“Kiba bun ki klob I-League ki don ka jingeh ha ka liang ka jinglut jingsep”, la ong uwei u heh jong ka klob. “Kam don jingmut ban ïashim bynta ha ka jingïalehkai (knockout) ha kaba phi lah ban pynkut noh tang ha kawei ka jingïalehkai. Kane ka kynthup ïa ka jingsiew sa shi bnai, ka jingleit jingwan bad ka jaka sah. Ka jingpynlang ïa ka pisa kan ïarap ïa ngi ha ka mang tyngka jong u snem ban wan.”
Katkum ka jingïalehkai kaba la dep ban pynbeit lypa, la ong ba ka Kerala Blasters ka la shah shah pynïakap ban ïakhun pyrshah ïa ka East Bengal ha ka sngi sdang jong kane ka lympung ka ban long ha 20 tarik mynta u bnai. Kata ka FC Goa, kaba la wan ba-ar ha ka ISL League, kan ïakhun pyrshah ïa ka kynhun kaba kham hapoh na ka I-League ka ban sa rai ha ka 6 tarik mynta u bnai- katba ka kynhun kaba kham heh pyrshah ïa ka Bengaluru.
“Ngi dangap ïa ka jingpynthikna na ki artylli ki kynhun ïalehkai ISL ruh kumjuh. Ki dang hap ban phah sha ngi ïa ka Participation Team Agreement” ong uwei u heh ka AIFF.
Ki kynhun kiba jop ïa ka Super Cup kin ïoh ïa ka lad ban ïakhun ha ka AFC Champions League 2 (ACL2) Playoffs jong u aïom ïalehkai 2025-26, kaba ailad ïa ki klob jong ka ri India ban buh ïa la ka jong ka dak ha ka continental stage.
