Moscow, Iaiong:
Kawei ka longkmie na Russia ka la shah pynngat kyndon ban shah rai pynshong patok hadien ba la lap ba ka ai mynsiem ia u kurim la jong uba dei ruh shipai Russia ban batbor naphang ia ki kynthei jong ka Ukraine ha ka por ba ka Russia ka dang sdang ban leit hiar thma sha Ukraine ha ki snem ba la leit. Kane ka jingpynshitom ka wan hapdeng ka jingïakynad kaba dang iai bteng hapdeng ka Russia bad ka Ukraine, kaba la paw pyrthei da ki kam sniew kiba la saphriang bha kynthup ïa ka jingïap, ka jingpynjot, bad ki kam runar kiba bun jait hapdeng ka jingleit hiar thma jong ki shipai Russia sha Ukraine. Ka jingleh jong katei ka kynthei ka la khring ia ka jingpyrkhat kaba jur kum shi bynta jong ka jingpynkheiñ ia ka hok longbriew-manbriew jong ki paidbah nongshong shnong ka ri Ukraine.
Katkum ki khubor, la iathuh ba ka Olga Bykovskaya, nongshong shnong jong ka Russia, ka la kyntu ia la u tnga uba dei u shipai jong ka Russia, ba un leh be-ijot bad ban batbor ia ki kynthei na Ukraine bad kumta kane ka nong Russia ka la shah rai pynrem halor ka jingpynkheiñ aiñ bad ka jingthmu ba sniew jong ka da kaba set patok ia ka haduh 5 snem kynthih hapoh Courtki, kaba don hapoh ka distrik Shevyiv.
Ha u bnai Iaiong 2022, ka tnat pahara jong ka Ukraine (SSU) ka la pynmih ïa ka audio jong ka jingïakren ba la shah khanglad hapdeng uwei u shipai Russia bad katei ka kurim jong u, ha kaba katei ka kynthei ka la ailad ia u tnga jongka ban leit batbor dusmon ia ki kynthei Ukraine ba un leit ban kput ia ki briew jong ka Ukraine.
Ki nongthoh khubor na ka tnat treikam jong ka Radio Liberty na Ukraine bad Russia, ki la pynithuh ia kitei ki arngut kum ka Olga bad u Roman Bykovsky, kiba sah ha Feodosia.
Ia kane ka kynthei na Russia la ai ia ka jingpynbna ba la suba ba ka la pynkheiñ ia ki aiñ bad ki riti dustur jong ka thma bad la buh ia ka ha ka thup jong ki nongwad jong ki riewlum. Ki ophisar jong ka aiñ jong ka Ukraine ki la pyndep ia ka jingtohkit bad ki la ujor ejahar pyrshah ia ka Olga Bykovskaya (Pinyasova) ha ka iingbishar ha u bnai Nohprah 2022.
