Shillong, Ïaïong 07
Ka Southampton ka la poi sha ka jingïateh soskular bad u Manager Ivan Juric ban mih noh hadien ba ka la hiar kyrdan noh na ka Premier League ha ka Sngi U Blei.
U Juric u la shah thung ha ka jaka u Russell Martin ha ka jingïateh soskular kaba 18 bnai ha u Nohprah hynrei u la pynjop tang 2 sien na 16 tylli ki jingïalehkai.
Ka jingshah rem ha ka Tottenham da 3-1 kol ha ka Sngi U Blei ka la pynlong ïa ka Southampton kaba don sha trai duh jong ka Premier League bad ka dangsah sa 8 tylli ki jingïalehkai.
Kane ka jingshah rem pyrshah ïa ka Spurs ka dei ka sien kaba 25 jong ka Southampton ha kane ka samoi ïalehkai ha ka league.
“U Ivan u la wan sha Southampton ha ka por kaba eh bad la bynshet ïa u ban pyrshang ban pynbha ïa ka kynhun ïalehkai kaba don ha ka jingeh kaba khraw,” ong ka Southampton.
“Sngewsih ba ngim shym la ïohi ba ki jingïalehkai ki ïaid shaphrang ha ka rukom kaba ngi la kyrmen, hynrei ngi ai khublei ïa u Ivan bad ki nongtrei jong u na ka bynta ka jinglong hok bad ka jingtrei shitom jong ki katba ki dang ïakhun pyrshah ïa ki jingeh ban pyrshang bad pynneh ïa ngi.”
“Da ka jinghiar sha ka Championship mynta la thikna, ngi ngeit ba ka long kaba kongsan ban ai khublei ïa ki nongkyrshan, ki nongïalehkai bad ki nongtrei katto katne ka jingshai halor ka lawei katba ngi dangïaid sha ka aïom lyiur kaba kongsan bha.”
La khmih lynti ba u Simon Rusk un wan shimti kum manager shipor ha kaba u Adam Lallana un long kum nongïarap jong u.
Ka Southampton bad ka Leeds ki dei napdeng ar tylli ki klob ba khatduh eh ban ïakhlad bad ar ngut ki nongpynïaid ba pura ha kajuh ka por ïalehkai. U Juric u la neh tang 107 sngi ha St Mary’s bad u la lah ban pynurlong tang ïa kawei ka jingjop ha ka Premier League kata da 2-1 kol ha Ipswich.
Ka jingshimti jong u ka dei ka sien kaba khyndai kum nongpynïaid ha ka histori jong ka Premier League.
Katba ka Southampton ka la don sha trai duh jong ka thup ïalehkai ryngkat 10 poiñ, ka donkam sa 2 poiñ ban lait na kaba pynliem ïa ka Derby County kaba la don 11 poiñ, kaba la ïoh rung ha ka aïom ïalehkai 2007-08.
U Juric u la poi ha Southampton hadien ba u la shah weng noh ha ka Roma ha u Naiwieng hadien ba u la ïakhun tang 12 tylli ki jingïalehkai na katei ka klob jong ka Serie A.
Une u manager ba la 49 snem ka rta u la don mynshwa bad ki klob kiba na Italy kum ka Torino, Hellas Verona, Genoa, Crotone bad Mantova.
