Shillong, Ïaïong 08
Ka North East Cricket Development Council (NECDC) ka la pynlong ïa ka 4th Achiever’s Night ha Chintan Hall, Gangtok, Sikkim ha ka Sngi U Blei.
Ka NECDC, kaba dei ka kynhun pynïaid jong ki hynriew tylli ki jylla jong ka thaiñ Shatei Lam Mihngi, ka la pynkup burom ïa ki nongïalehkai ba paw ha ka kriket shynrang bad kynthei ha baroh ki jingïalehkai ha ka samoi ïalehkai jong ka BCCI kaba dang shu kut shen.
U Myntri Rangbah ka Sikkim, Prem Singh Tamang u la long kum kongsan katba u Lamphang ka Ïing Dorbar Thawaiñ ka Sikkim u Mingma Norbu Sherpa u la long kum symbud kongsan. La don lang ruh ki myntri sorkar bapher bapher jong ka Sikkim kum ki nongshah khot sngewbha.
La sam ïa ka khusnam kyrpang sha ka Meghalaya Cricket Association kum ka jingithuh ïa ka jingïalehkai ha ka Elite Group jong ka samoi ïalehkai BCCI 2024-25 nalor kiwei pat ki khusnam shimet.
Kiwei pat kiba la don lang ha katei ka sngi ki long u MKJ Mazumdar uba dei dkhot ka Apex Council jong ka BCCI, u Naba Bhattacharjee, President ka MCA bad Co-Convenor ka NECDC bad u T. Subba, President ka synjuk ïalehkai kriket jong ka Sikkim. La ai khublei ïa ki President bad ki Secretary jong baroh hynriew tylli ki synjuk ïalehkai jong ki jylla da u kongsan bad ka MCA ka la pynkup burom ïa u Tamang da ki riam bad ki jingai sngewbha Khasi tynrai bad Garo.
Ïa ka conclave kaba shiphew jong ka NECDC, ba la pynïaid da u Bhattacharjee, la pynlong hadien ka jingsam khusnam ban pynbiang ïa ki jingbthah jong ka jingïatreilang hapdeng hynriew tylli ki jylla nalor ka jingpynkhreh ïa ka almanak ïalehkai hapdeng kine ki jylla.
