Mawkyrwat, Ïaïong 08
Ka Federation of Khasi Jaiñtia & Garo People (FKJGP) ka la pynkup burom ryngkat ka jingai sngewbha da ka momento ïa u khlur nongñiah saikil ka Jylla u Kevin Lyngdoh Sangriang, uba la wanrah burom ïa ka dong ka thaiñ bad ka Jylla baroh kawei da kaba khur ïa ka takma ksiar ha ka 21st National Mountain Bike Championship 2025 kaba long ha Morni Hills, Haryana.
U Bah Enbor Syiem, General Secretary jong ka FKJGP Mawkyrwat Circle, haba kren ha ka jingïalang u la pynpaw ka jingaikhublei na ka bynta u Kevin Lyngdoh Sangriang uba dang 15 snem ka rta, uba la poi sha ka thong jong ka jingjop ha ka jingïakop ñiah saikil jong ka 21st National Mountain Bike Cham-pionship 2025.
U Bah Enbor Syiem u la ong ruh ba ka jingjop bad wanrah nam wanrah burom jong une u samla ka la long ka nuksa ba bha ïa ki para samla jong ka dong ka thaiñ ba haba ki don hapdeng jong ka jingïaleh ki dei ban don ïa ka thong ban poi beit sha ka jingjop”
Lah ban pynkynmaw ba ha katei ka jingïakop u Kevin u la khur ar tylli ki ksiar ha ka Cross Country Time Trial bad ha ka Cross Country Olympic (XCO).
