Shillong, Ïaïong 09
Ka Inter Milan ka la jop pyrshah ïa ka Bayern Munich da 2-1 kol ha ka quarter final (1st leg) jong ka Champions League kaba la long ha ka Sngi Balang. Kane ka la wan urlong lyngba ka kol kaba khatduh lyngba u Davide Frattesi ha ka minit kaba 88 ha Allianz Arena.
U Lautaro Martinez u la ïoh ban pynkhih jar nyngkong na ka bynta ka Inter ha ka minit kaba 38, hadien ba u Marcus Thuram u la ïarap pynbuh bol. Hynrei u Thomas Mueller u la lah ban pynïakhaid na ka bynta ka Bayern ha ka minit kaba 85 shuwa ba u Frattesi un pynjop ïa ka Inter.
Ha kane ka jingïakhun ka Bayern kaba la mad ïa ki jingmynsaw, ka la pyrshang ban ïalehkai bha ha kaba sdang ha kaba u Michael Olise bad u Harry Kane ki la ïoh ïa ki kabu kiba biang.
Ka jingïakynduh jingeh ha ka jingmynsaw da kane ka kynhun ïalehkai na Germany ka la ktah khamtam eh ïa ka jingïalehkai ha ka bynta kaba shadien namar tang u Eric Dier bad u Kim Min-jae kiba lah ban long kum ki nongïalehkai ha ka bynta kaba shadien. U Manager kane ka kynhun u Vincent Kompany u la pynkynriah ïa u Raphael Guerreiro sha ka kyrdan ba 10 hadien jong u Kane ban bujli ïa u Jamal Musiala uba la mynsaw.
U Olise u la long u rangïalehkai ba shyrkhei bha, ha kaba u la ïoh ban shut sha kol najngai hadien hynñiew minit bad u la buh jingma ïa u rangapkol u Yann Sommer.
U Kane u la ïoh ïa ka kabu kaba biang bha na ka bynta ka Bayern ha ka kylla step lyngba ka jingïarap lang u Olise hynrei um shym la lah ban pynurlong ha kaba ka bol kaba u la shut ka la leit dei na diengkol.
Te kumta kine ki kynhun kin ïakynduh biang ha ka 17 tarik mynta u bnai na ka bynta ban rai ban iaknieh rung sha ka semi final.
Haba phai sha kawei pat ka jingïakhun quarter final (1st leg) ka Arsenal ka la pynliem noh ïa ka Real Madrid da 3-0 kol ha Emirates Stadium.
U Declan Rice u la thep ar kol ha ka kylla miet, katba u Mikel Merino u la bynrap ïa ka kol kaba lai na ka bynta ka Arsenal shwa ba u Eduardo Camavinga ka Real Madrid un shah beh na madan.
Kine ki kynhun kin ïakynduh biang ha ka wat ba ar ha Bernabeu bad lada ka Arsenal ka dang lah ban ïai bteng ïa ka jingjop, kan long ka jingplie lad ban don ha ka jingïaknieh ha ka sien kaba nyngkong ha ka Champions League.
