Kyiv, Iaiong:
U President jong ka Ukraine, Volodymyr Zelensky, ha ka Sngi Ba-ar u la pyntip ba ki shipai ka Ukraine ki la ioh bat ia 2 ngut ki shipai ka China kiba ïakhun thma na ka bynta jong ka Russia, ha kaba ka Ukraine ka la dawa ia ka jingpynshai na ka China haba iadei bad kane ka bynta.
Ka Russia bad ka China ha kine ki snem ba la dep ki la sngew sarong ïa ka jingïatreilang jong ki kaba “khlem pud” bad pynjylliew ïa ka jingïatreilang ha ka saiñpyrthei, ha ka liang ka jingai jingkyrshan tnat shipai markylliang bad kumjuh haba iadei bad ka jingiatrei lang ha ka liang ka ioh- ka kot naduh ba ka jinghiar thma ba pura jong ka Russia ïa ka Ukraine ka la sdang ha u bnai Rymphang jong u snem 2022.
Kumta u Zelensky ha katei ka sngi, u la ong ba ki shipai jong ka Ukraine ki la ioh kem ia 2 ngut ki nongshong shnong jong ka China, kiba la iakhun na ka kynhun shipai jong ka Russia. Ia kitei ki shipai China la ioh kem na ki bynta jong ka Ukraine, ha ka thaiñ jong ka nongbah Donetsk.
U Zelensky u la ong ruh ba ka Ukraine ka don ia ki kot- ki sla jong kitei ki koidi, ki Bank card bad ki jingtip shimet ba iadei shaphang jongki.
Katkum ka video ba la pyllait da ki shipai ka Ukraine ha katei ka sngi, la pyni ia uwei u briew, uba phong ia ki jaiñ shipai bad ba la teh ia ki kti jong u, uba kren da ka sur kaba rit, ha ka ktien Mandarin, ha ka por ba iakren bad uwei u heh sorkar jong ka Ukraine.
Uwei u heh ophisar jong ka Ukraine, u iathuh ha ki nongthoh khubor, ba kitei ki koidi, ki lah ban dei beit hi ki nongshong shnong jong ka China, kiba la shah pynngop ban ia soi ia ka jingiateh bad ki shipai jong ka Russia.
