Shillong, Ïaïong 09
Ka India ka la lah ban pynpaw ïa ka jingtbit ha ka lympung ïakop siat suloi ba la tip kum ka ISSF World Cup ha Buenos Aires, Argentina ha kaba ka la khur ar tylli ki takma ksiar ha ka Sngi Balang.
Ka Suruchi Singh, ka khlur kaba dangkhie dangsan, ka la ïoh ïa ka takma ksiar kaba nyngkong eh na ka bynta ka ri ha ka 10m air pistol jong ki kynthei, da kaba pynliem ïa ki lai ngut nongsiat ba paw jong ka China.
Ka Suruchi kham mynshwa ka la wan hakhmat duh ha ka thup ïakhun da kaba ïoh 583, kata hakhmat eh ïa ka Qian Wei ka China (582-23x) bad ka Jiang Ranxin (582-17x) na China. Ka Suruchi kaba la shah tam haduh khyndai na ka bynta ban hiar sha kaba saw hynrei hadien ka la jingwanphai biang.
Ka Suruchi ka la pyni ïa ka jingtbit ha ka jingïalehkai ba nyngkong eh, ha kaba ka la ïoh 10.7 bad 10.8. Naduh katei ka khyllipmat, ka la nang pynjlan ïa ka jingjop jong ka bad ka la wan ha khliehduh da ka 244.6 ha kaba kut ka ïoh ïa katei ka kyrdan. Ïa ka kyrdan ba-ar la khur da ka Qian Wei da kaba ïoh 241.9 katba ka Jiang Ranxin kaba la khur arsien ha ka Olympic, ka la khur ïa ka takma rnong da kaba ïoh 221.
Ha ka jingïakop jong ki shynrang, u Vijayveer Sidhu u la khur ïa ka takma ksiar ha ka 25m rapid fire pistol. Une u rangïalehkai bad u Riccardo Mazzetti na Italy ki la ïakhun tyngeh ban ïaknieh na ka bynta ban ïoh ïa ka kyrdan kaba hakhlieh duh.
Kumba ka long mynta ka India ka la khur haduh hynriew tylli ki takma, kynthup ïa sa wtylli ki takma ksiar.
