London, Iaiong:
Katkum ki khubor la ong ba ka Ukraine, kan ioh ia ka jingïarap pisa naka bynta ka tnat pahara jongka, ka ban kot ia ka 450 Million Pound ($580 Million), ong ka Britain, ha ka Sngi Palei bad ka long ruh ka kum kane ka por ba ki para marjan ri na Europe, ki dang pyrshang ban ai jingkyrshan ia ka Ukraine, ha shwa jong kano- kano ka jingkylla hapdeng ka jingiateh sorkular bad ka Russia.
Kumta la ong ba ka Britain kan ai haduh 350 million pound sha ka tnat shipai jong ka Ukraine khnang ba kan lah ban pynkhlaiñ ia ka jingiada jongka, khnang ba kan lah ruh ban ialeh pyrshah ia ka jingleit thombor dusmon ba khlem sangeh jong ka Russia.
Kane ka jingnoh synñiang jong ka UK ha kane ka sien, la ong ruh ha kum kane ka por ba u Myntri kam poh ïing jong ka Britain u John Healey u long u nongialam jong ka jingialang jong ka Ukraine Defense Contact Group ha Brussels ryngkat bad u paralok jong u na Germany u Boris Pistorius. Kane ka kynhun ka kynthup ïa ka NATO bad kiwei kiwei ki ri kiba kyrshan ïa ka Ukraine.
Namar kata, la ong ba kane ka jingbei tyngka jong ka Britain sha ka Ukraine, kan iarap ban pynbit- pynbiang ia ka tnat shipai ka Ukraine ha ka liang ki kali bad ki tiar ïakhun bad kumjuh ruh ki ‘radar system’ bad kiwei de ki tiar ïada ban ialeh pyrshah ia ki tup- ki man jong ka Russia bad kan iarap ruh ban wanrah da ki spah hajar tylli ki drone sha ka Ukraine.
U Healey, ha ka sngi Thohdieng, u la pynïaid ïa ka jingïalang jong ki Myntri ïada ri jong ka kynhun ba la khot ka “Coalition of the willing”, ka kynhun ban pynneh pynsah ïa ka jingsuk, ba la lam khmat da ka ri Bilat bad ka France, lada jia ba don ka jingïateh kular ha ka jingïakynad hapdeng ka Russia bad ka Ukraine.
