Shillong, Ïaïong 11
U Symbud Lamphang ka ïingdorbar thaw aiñ ka Jylla, Timothy D Shira ha ka sngi Thohdieng u la leit mih hakhmat ka ïingkashari u Chief Judicial Magistrate, Shillong bad ai ïa ki sakhi bad jingbatai (statement) ban shong bishar ïa ka mukotduma ba u mudui pyrshah ïa ar ngut ki nongpynmih YouTube.
Ha kane ka mukotduma, u Timothy u la dawa ïa ka bai mynraiñ khmat mar T.100 klur na kitei ar ngut ki nongpynmih YouTube namar ka jingpynsaphriang ïa ki jingtip bakla ha kaba ïadei bad ka jingai jingkren jong u hapoh ka ïingdorbar halor ka jingpynlong ïa ka Tura kum ka Nongbah Tlang ka Jylla.
Haba kylli, la ka don ka lad ban pynbeit ne ïakren sngewthuh jingmut ïa kane ka kam shabar ka ïingkashari, u Symbud Lamphang u la ong ba kan ym don shuh ka jingïapynbeit ne ïakren sngewthuh jingmut namar ki ar ngut ki nongleh social media kim shym la pyni ïa ka jingbabe ne ka jingbakla ïa kaei kaba ki la leh.
“Kim don satia ïa ka jingbabe ne ka jingsngew ba ki leh bakla, kumno ngin ïakren pynbeit ïa ka? Kan ym don satia ka jingïakren pynbeit. Ka la pynthohbria ïa ka longrynïeng jong nga haduh katta-katta bad nga hap ban pyrkhat arsien-laisien ban wan sha ka jingïakren sngewthuh jingmut”, ong u Timothy.
U Muktiar jong u Symbud Lamphang, Sujit Dey u la ïathuh ba u Symbud Lamphang u la ai ïa ki jingbatai hapoh ka kyndon 323 jong ka BNSS bad ïa kine ki jingkren jong u la buh jingthoh bad ka ïingkashari kan sa shong bishar ïa ka.
“Ka dei ka mukotduma kam bymman, ïa ki jingbatai bad sakhi jong u yn sa shong bishar, bad ka ïingkashari kan sa pynmih ïa ka hukum lada ka sngew ba ka don ka jingpynjah burom ïa u briew jong nga”, u la ong.
U Dey u la ïathuh ba ki don ar tylli ki mukotduma ba la mudui da u Symbud Lamphang; kawei ka kam bymman bad kawei ka ‘civil defamation case’, ha kaba u la ïathuh ba kaba la leit ban ai sakhi ka dei ïa ka mukotduma kam bymman.
U la ïathuh ruh ba ha shwa kane, ka dei ka mukotduma ‘civil defamation case’ ha kaba la kam ïa ka bai lutksan namar ka jingpynjah burom ïa u Symbud Lamphang.
“Ha kane ka civil defamation, ngi la dawa mar T.100 klur na kine ki nongshah mudui, ym tang ba ki la pynjah burom ïa u briew jong nga, hynrei ka la pynthohbria wat ïa ka ïing ka sem jong u baroh kawei,” la ong u Dey.
Une u Muktiar u la ong shuh shuh ba kino-kino ki don ïa ka hok ban pynpaw ïa ka jingsngew ka jong ki ha kano-kano ka kam ha ki rynsan social media, hynrei kam dei pat ban pynmong ne pynjah burom ïano-ïano.
