Yemen, Naiwieng:
Ki lehnoh Houthi jong ka Yemen, kiba ju ioh jingkyrshan na ka Iran, ha ka Sngi Nyngkong, ki la ong ba ki la thombor ïa ka kad liengsuiñ jong ka Dammam, kaba don ha ka phang Mihngi jong ka Saudi Arabia, hadien ba ki la thombor da ki taiew pyrshah ïa katei ka hima kaba riewspah bha ha ka umphniang.
U nongaiktien jong ki shipai, u Yahya Saree, ula kam ruh, ba ki don ki jingshah thombor ha ka Saudi, kaba ai jingmaham kloi, ha ka radar bad ha ka liengsuiñ kit shipai, baroh ar tylli ha ka thaiñ shatei lam mihngi jong ka hima.
Ki Houthi ki ïakhun pyrshah ïa ka kynhun synrop ba la ïalam da ka Saudi kaba kyrshan ïa ka sorkar Yemen ba la ithuh da ka pyrthei, ka thma pohïing kaba la khie biang ha u bnai Jylliew hadien ka
jingsangeh thma kaba la neh bun snem.
“Ki shipai jong ngi, ha kine ki 48 kynta ba ladep, ki la jop ban siat ïa ka kad liengsuin Dammam ha ki ar bynta da ki ar tylli ki drone,” la ong u Saree.
“Ka jingtreikam ka la pynurlong ïa ka jingthmu jong ka da kaba jop bad ka la wanrah ïa ka jingthut ha ka jingleit jingwan jong ki liengsuin ha kad liengsuin.”
Ha kajuh ka por, ka kynhun synrop ha ka sngi Nyngkong ka la ong ba ki shipai jong ka ki la bat ar tylli ki drone ha ki jaka jong ka nongbah Riyadh.
“Ka jingpynthut bad pynjot ïa ki ar tylli ki drone ha ka thain Riyadh”, la ong u nongaiktien jong ka kynhun synrop, u Turki al-Malki, ha ka jingthoh ha ka X, khlem da jer kyrteng ïa u nongleh kam sniew.
Ka United Nations, ka ong ba palat 1,600 ngut ki briew ki la iap bad palat 300,000 ngut ki la phetwir naduh ba la sdang biang ka jingialeh ha Yemen kaba duk.
