Shillong, Ïaïong 13
Ka Barcelona ka la ïoh ïa ka jingjop kaba kongsan bha pyrshah ïa ka Leganes da 1-0 kol bad kawei ka la wan urlong lyngba ka jingïarap pynthep da u Jorge Saenz ha madan Butarque na ka bynta ban bteng ïa ka jinglamkhmat ha ka lympung La Liga da kaba tam haduh 7 point.
Kane ka jingjop ka pynneh ïa ka jingbym shah rem kane ka kynhun ha ki 24 sien ïakhun ha u snem 2025 bad ka la don ha ka lynti ban ïoh rap ïa ka nam lahduh kaba saw sien ha kane ka samoi.
Ka jingïalehkai jong ka Barcelona kam shym la long kumba ka ju leh, hynrei ka la lah ban pynurlong ïa ka jingjop hadien ba ka la jop ïa ka Borussia Dortmund da 4-0 ha ka Champions League ha ka taïew ba la lah.
“Ka jingïakhun bad ka jingmut jingpyrkhat ba ka kynhun ka la pyni mynta ka sngi ka long kaba itynnad bha,” la pynpaw u Manager ka Barcelona u Hansi Flick. “
“Ha kaba kut kaba kongsan ha kane ka jingïalehkai ka long ban khur ïa ki lai poiñ,” la pynpaw u rangïalehkai ‘dien jong ka Barcelona, u Eric Garcia. “Nga pyrkhat ba kane ka dei ka jingïalehkai kaba ngi dei ban khur ï aka jingjop, ngi don ha ka kyrdan ba hakhlieh duh jong ka miej, kaba dei ka jaka kaba ngi kwah eh ban don, bad mynta ka sngi ngi lah ban pynjlan ïa kata ka jingjngai khyndiat.”
Kane ka jingïalehkai ka dei ka wanphai biang da ka jingkhlaiñ bor naduh u Nohprah jong u snem ba la lah pyrshah ïa ka Leganes da 1-0 ha ïing jong ka Barcelona.
Ka Leganes ka la thaw ïa ki kabu kiba biang eh ha ka kylla step lyngba u u Dani Raba uba al pynbuh bol na ka bynta u Adria Altimira, ïa kaba ïa ka kol jong u la lah ban khanglad noh da u rangapkol ka Barcelona, u Wojciech Szczesny.
Ka Barcelona ka la mad ïa ka jingeh hadien ba u nongïalehkai ‘dien u Alejandro Balde u la ngat ha ka jingmynsaw hashwa ka kylla step. “U Balde um shym la lah ban ïalehkai na ka daw ka jingmynsaw, hynrei ngin hap ban ap haduh ka sngi kaba bud,” la ong u Flick halor ka jingmynsaw utei u rangïalehkai.
