Guwahati, ïaïong:
Katba ka ilekshon sha ka Assam Panchayat ka la jan, kaba la buh ha ki ar bynta ha ka 2 tarik u Jymmang bad 7 tarik u Jymmang, ka National Democratic Alliance (NDA) ka la sdang ïa ka jingïalap ilekshon kaba khlaiñ bha ha baroh kawei ka jylla. La pyndep ïa ka jingpynkhreh, bad ki nongtrei jong ka seng ki dang ïashim bynta shitrhem ban pynmih jingkyrshan ïa ki kyrtong ba la kyrshan da ka NDA.
U Myntri Rangbah ka jylla u Himanta Biswa Sarma un ai jingkren ha ki 27 tylli ki jingïalang paidbah, katba u President ka BJP Assam Pradesh u Dilip Saikia u la thmu ban pynlong palat 50 tylli ki jingïalang ïalap ilekshon. La khmih lynti ruh ba kiwei pat ki heh nongïalam na ka kynhun NDA kin ïashim bynta ha ki jingpyrshang ban ïalap ilekshon, kumba la kdew ha ka jingpynbna jong ka seng.
Ban pynthikna ïa ka jingjop ha kane ka ilekshon, u Dilip Saikia u la kyntu ïa baroh ki dkhot ka seng ba kin aiti lut ïalade ha ka jingïalap ilekshon. La phah ïa ki nongïalam ha ka kyrdan jong ka jylla sha ki kyrdan Mandal bad distrik ban pynïadei bad ki seng synrop ba la ïatreilang. La pyndep ïa ka jingjied ïa ki kyrtong lyngba ki jingïakren ba ïa mynjur lang.
Na ki 397 tylli ki konstitwensi jong ka Zila Parishad, ka BJP ka la pynbna ïa ki kyrtong na ka bynta 318 tylli ki konstitwensi, ha kaba 74 tylli la mang sha ka Asom Gana Parishad (AGP) bad kiwei pat sha ki seng ba la ïatreilang. Ïa ki 5 ngut kiba dang sah la pynbna mynta ka sngi, ba kynthup ïa saw ngut ki kynthei bad uwei u shynrang bad baroh ki kyrtong kynthei ki la poi sha ka 176 ngut.
La pyndep ruh ïa ka jingïasam jaka na ka bynta ki 2,157 tylli ki Anchalik Panchayat konstitwensi hadien ba la ïamir jingmut ha ki kyrdan bapher bapher.
Ha ka jingpynbna pathai khubor, u Saikia, u la ban jur ïa ka jingdonkam jong ki jingïateh lok kiba shisha bad kiba don burom, da kaba pynïapher ïa ka bad ka liang pyrshah, kaba u la kynnoh ba ka pynmih ïa ka jingkulmar ha ka kyrteng jong ka saiñ pyrthei jingïateh lok.
Ka Assam State Election Commission ka la pynthikna ba ka jingthep vote kan long ha ka 2 tarik Jymmang ha ki 14 tylli ki distrik bad ha ka 7 tarik Jymmang ha ki 13 tylli ki distrik kiba dang sah. Ka jingñiew vote la buh ban long ha ka 11 tarik u Jymmang.
Palat 1.80 klur ngut ki nongthep vote, ba kynthup ïa 90.71 lak ngut ki nongthep vote shynrang, 89.65 lak ngut ki nongthep vote kynthei, bad 408 ngut ki nongthep vote na kiwei pat ki kyrdan, la khmih lynti ba kin thep vote ha ki 25,007 tylli ki jaka thep vote ha kylleng ka jylla.
