Shillong, Ïaïong 16
Ka Myntri Khynnah ka tnad Women & Child Development ka Sorkar India, ka Savitri Thakur, ha ka sngi kaba ar jong ka jingwan jngoh sha ka Jylla ka la pynlong ïa ka jingleit jngoh ïa ka East Khasi Hills District ha ka Sngi Balang, ban khmih bniah halor ka jingpyntreikam ïa ki skhim ba kongsan bad ban ïakren bad ki nongshim bynta ha ka kyrdan jong ki shnong ki thaw.
Kum shi bynta jong kane ka jingleit jngoh, ka Myntri ka la leit ban jurip ïa ka ‘One-Stop Centre’ – ‘Shakti Sadan’, kaba don ha Mawroh.
Kumba ka long, ki don 18 ngut kiba shong ba sah ha kane ka jaka hapdeng ka rta 18 haduh 50 snem, bad ki ïadon bynta ha ki prokram ai jinghikai ba ïadei bad ka kam ka jam.
Na ka liang ka Myntri ka la ïakren bad kiba sah ha katei ka jaka bad pynshlur halor ki jingpyrshang jong ki haba phai sha ka jingpynkupbor bad jingpynbha biang ïa ka jingim kumba ju long.
Ka Myntri ka la leit jngoh ruh ïa ka ‘Child Care Institution’ ha Mawkasiang, ha kaba ka la ïakynduh ïa ki nongtrei, ki khynnah, bad ki nongsumar.
Ha kajuh ka por, ka la ai jingïaroh halor ka jingtreikam jong kane ka jaka ha ka ban pyntikna ïa ka jingïada bad jingsumar sha ki khynnah bad ban jur halor ka jingdonkam ban bteng ïa ka jingkyrshan ha ka liang ka jingmut-jingpyrkhat bad ka pule-puthi kaba bha na ka bynta ki khynnah kiba donkam ïa ka jingsumar bad jingïada. Ha ka ‘Anganwadi’ Centre ha Mawsmai, ka Myntri ka la khmih bniah ïa ki jingshakri ba la pynbiang lyngba ka skhim Integrated Child Development Services (ICDS), kynthup ïa ka jingbam ba tei met, ka jingai jinghikai hashuwa ban pynïasoh sha ki skul, bad ka jingpeit bniah ïa ka koit ka khiah.
Ka Thakur ka la ai jingïaroh halor ka jingaiti lut jong ki nongtrei ‘Anganwadi’ bad ki nongïarap bad ai mynsiem ïa ka jingïashim bynta kaba neh jong ka imlang-sahlang ha ki prokram ba ïadei bad ka bha ka miat jong ki khynnah.
Ha kawei ka liang, ha ka jingleit jngoh jong ka ïa ka Community Health Centre (CHC) ha Sohra, ka Myntri ka la bishar bniah ïa ki jingshakri ha ka koit ka khiah na bynta ki longkmie bad ki khyllung, ka jingdon jong ki dawai ba donkam, bad ka jingpynïasoh lang ïa ki skhim ka koit ka khiah bad ka jingbam ba tei met.
Haba ïadei bad kane, ka Myntri ka la pynskhem biang ïa ka jingkut jingmut jong ka Sorkar ban pynbha ïa ka jingïoh jingsumar na ka bynta ki kynthei bad ki khynnah, khamtam ha ki jaka ba kyndong bad ki jaka ‘riewlum.
Kane ka jingleit jurip, ka la kynthup lang ruh ïa ka jingjurip jong ki projek pynroi ha ki jaka nongkyndong kiba hap hapoh ka MGNREGS bad PMAY-G. Shuh shuh ka Myntri ka la ïakren bad ki nongïoh jingmyntoi bad bishar bniah ïa ka jingïaid shaphrang jong kine ki sienjam.
Ka la ai burom ruh ïa ka jingïatreilang hapdeng ki tnad treikam bapher-bapher kaba la ïarap shi kat dei ha ka ban kyntiew ïa ka lad kamai ha ki jaka nongkyndong.
Nalor kane, ka Myntri ka la pynkut ïa ka jingleit jngoh jong ka da kaba ai khublei ïa ki bor distrik bad ki nongshim bynta jong ka thaiñ na bynta ka jingtrei shitom jong ki ha ka ban pynkhlaiñ ïa ka jingsumar ha ki jaka sumar, ka bam ka dih, bad ka jingpynkupbor ba kyllum ïa ki kynthei bad ki khynnah ha ka Jylla.
