Shillong, Ïaïong 16
Ka Mawsynram Cluster (Girls) ka la lah ban pynthikna ban jam sha ka final ha ka (L) Benjamin Diengdoh Memorial U-16 Girls Inter School Cum Cluster Cricket Tournament 2025, hadien ba ka la ïoh jingjop kaba ar da kaba pynliem noh ïa ka Sohra Cluster lyngba ka DLS method 153 run.
Ha kane ka jingïakhun kaba la long ha ka Sngi Balang ha madan Saitsohpen kaba ha Sohra, ka Mawsynram ka la kam trai ban tied nyngkong ha kaba ka la ïoh 173 run bad shah pynhap 7 wiket ha ki 20 over. Ka Eliza Lyngdoh ka la long ka nongtied kaba la ïoh bun eh da kaba tied 61 run na ki 44 bol. Katba ka Libashisha Khongngain ka la shim 2 wiket na ki 4 over.
Haba wan beh ïa ka thong, ki nongtied ka Sohra Cluster ki la ïoh tang 24 run bad shah pynhap 6 wiket ha ki 10.3 over. Ka Inroihame L. Nonglait ka la tied 4 run na ki 18 bol. Katba ka Sharaisuk Marpna ka la shim 2 wiket ha ki 2 over. Ïa ka nam Player of the Match la ïohpdiang da ka Eliza Lyngdoh.
Ha kane ka lympung ki la don tang lai tylli ki kynhun kiba la wan ban shim bynta bad ha ka Sngi Ba-ar, ka Mawsynram ka la lah ruh ban pynliem ïa ka Pongtung da 151 run.
Te kumta ka Mawsynram kan ïakynduh final pyrshah ïa ka kynhun ka ban jop mynta ka Sngi Palei hapdeng ka Sohra bad ka Pongtung.
