Kolkatta, ïaïong:
U Lat ka jylla West Bengal u CV Ananda Bose bad ka Myntri Rangbah ka Mamata Banerjee kim shym la ïakynduh markhmat ha ka sngi Palei ha kaba ïadei bad ka jingthmu jong u ba ha shwa ban leit jngoh ïa ka nongbah Murshidabad kaba la shah pynkhihwin. Ka Banerjee ka la kyrpad ïa u Bose ban pynjlan ïa ka jingleit jong u, ha kaba u la kyntait.
Ka Banerjee ka la kyntu ban pynjlan por, da kaba ong ba ka jinglong jingman ha Murshidabad, kaba la shah ktah ha ka jingïakynad hapdeng ki jaitbynriew ha ka taïew ba la lah, ka dang shu wanphai biang sha ka jinglong kaba rim.
“Ngan kyrpad ïa ki bym dei ki trai shnong ba kim dei ban leit sha Murshidabad mynta hi. Ngan kyrpad ïa u Lat ba un ap sa katto-katne sngi namar ba ki lad ban pynskhem ïa ka jingshaniah ki dang ïaid shakhmat. Ka jinglong jingman ka la nang ïaid beit,” la ong ka Banerjee haba jubab ïa ki khubor ba u Lat u lah ban leit sha katei ka distrik hynnin ka sngi kumba u la thmu.
Hynrei u Lat ka jylla u Bose u la ong ba u thmu ban leit jngoh ïa ka distrik ban leh ïa ka jingbishar bniah ïa ka jinglong jingman.
“Ngan leit khari-khari sha Murshidabad. Ngan leit ban peit hi dalade ïa ki jingshisha. Ngan don ka jingïohi kaba janai ïa kane ka kam. La lah ban tehlakam ïa ka jinglong jingman. Ngi dei ban shim ïa ki sienjam kiba kham bniah ban ïada na ki jingjia kiba kum kine ha ki por ban wan. Ki briew na katei ka thaiñ ki la kyrpad ïa ka jaka sah jong ki BSF hangtei hadien ba la ïakynduh ïa ki nongthoh khubor.
Ym duna ïa ka lai ngut ki briew ki la ïap, bad katto katne ngut kiwei pat ki la mynsaw ha ki jingïakynad ha ka taïew ba la lah, kaba la pynlong ban phah ïa ka kynhun pulit kaba bun, ryngkat bad ki shipai ka sorkar pdeng, ban tehlakam ïa ka jinglong jingman.
Haba ther ïa ka sorkar pdeng halor ki jingkylla ha ki kyndon pahara khappud, ka Banerjee ka la ong, “U Myntri ka tnat ki kam pohïing ka sorkar pdeng ba mynta u Amit Shah u la wanrah ïa ka aiñ kaba thymmai kaba pynjlan ïa ka jingsynshar jong ki BSF na ka 15 km sha ka 50 km (na khappud). Kumta, ki BSF ki dei ban don ka jingkitkhlieh.”
Ka Banerjee ka la kynnoh shuh shuh ba ka tnad kam pohïing jong ka sorkar pdeng kam shym la ïasam ïa ki jingtip ba bniah shaphang ki riew shimet kiba wan rung sha kane ka jylla na ki bar ri.
Ka la khot ruh ïa ka jingkitkhlieh kaba kham khraw na ki BSF hadien ba la pynjlan ïa ka bor synshar jong ki sha ka 50 kilomitar na khappud.
Haba ther ïa ka sorkar pdeng halor ki jingkylla ha ki kyndon pahara khappud, ka Banerjee ka la ong, “U Myntri ka tnat ki kam pohïing jong ka sorkar pdeng u la wanrah ïa ka aiñ kaba thymmai kaba pynjlan ïa ka jingsynshar jong ki BSF na ka 15 km sha ka 50 km (na khappud).”
Ka la kynnoh ba ka tnad kam pohïing jong ka sorkar pdeng kam shym la ïasam ïa ki jingtip ba bniah jong ki riew shimet kiba wan rung sha kane ka jylla na bar ri.
Ka la khot ruh ïa ka jingkitkhlieh kaba kham khraw na ki BSF hadien ba la pynjlan ïa ka bor synshar jong ki sha ka 50 km na khappud.
