New Delhi, Iaiong:
U jumai ba 5.8 Magnitude u la pynkhynñiuh ia ka Afghanistan ha ka Sngi Saitjaiñ ha ka por kumba 12 baje mynsngi.
Ka phang pdeng ba utei u jumai u la pynkhynñiuh jur ka long 36.10 Degree North Latitude bad 71.20 Degree East Longitude, ha ka jingjylliew kaba 130 kilometre.
La ong ba utei u jumai ha katei ka sngi la sakhi bad iohsngew ruh na katto-katne ki bynta jong ka ri India kum ha Jammu & Kashmir bad ha ki bynta NCR jong ka nongbah Delhi.
Hynrei tad haduh ba la ioh ban pyllait paidbah ia kane ka khubor ha ka janmiet Sngi Saitjaiñ, ym shym la ioh jingtip eiei ban don kiba mynsaw ne kiba shah ktah na utei u jumai ha katei ka sngi.
Une u jumai u dei ruh hadien ka jingkhynñiuh jumai ha ki khyndiat sngi ba la leit jong kane hi ka taïew ba la dep, ha kaba u jumai uba 5.6 Magnitude u la pynkhynñiuh ia katei ka ri, kumba 164 Km na ka phang Mihngi jong ka nongbah Baghlan.
Ka tnat European-Mediterranean Seismological Centre (EMSC) ka la pynbna teng ha ki khyndiat kynta ba la leit ba utei u jumai u la kot sha 6.4 Magnitude ka jingkhlaiñ hynrei ka la pynthymmai bad pynkylla pat hadien sha ka 5.6 Magnitude hadien ba la ioh ban peit-thuh bha.
