New Delhi, ïaïong:
Da kaba pynleit jingmut ha ka aïom slap ka ban sa wan, ka Municipal Corporation of Delhi ha ka sngi Palei ka la pynlong ïa ka jingïalang ban ïakren halor ki lad ki lynti ban ïakhun pyrshah ïa ka jingtuid um, ban pynbha ïa ka jingkhuid jingsuba bad ban pynthikna ïa ka jingshngaiñ jong ki paidbah.
Haba pynksan ïa ka jingdonkam jong ka jingpyntreikam bad ka jingïatreilang, u Commissioner ka MCD u Ashwani Kumar u la bthah ïa ki ophisar ba kin pynthikna ba ym don kano kano ka jaka kaba shah iehnoh beiñ namar ka jingpynslem ne jingbym lah ban treikam.
Kane ka dei ka jingïalang kaba nyngkong eh kaba la pynïaid hapoh ka MCD ban ïakren ïa ka jingpynkhreh ïa ka jingkhriat lyngba ka jingpynshai kaba bniah bad ka jingïakren.
Ki mat ba kongsan ba la ïakren ha kane ka jingïalang ki kynthup ïa ka jingpynkhuid ïa ki nala um kiba don hapoh ka jingpeit jong ka MCD ban ïada na ka jingtuid um, ka jingthung ïa ki Nodal Officer na ka bynta ki jaka ba lah ban tuid um, ka jingshna map ïa ki nala um ha baroh arliang jong ki jaka ba shah ktah bad ka jingpynkynriah ïa ki kynhun nongtrei bad ki nongtrei ba peit ïa ki jaka ba rit paid.
Ki jingïakren ki la ktah ruh ïa ka jingpynkhuid ïa ki tyllong um sump baroh shisngi ha ki jaka tan um, ka jingpynbha bad jingbuh ha ka rukom kaba stad ïa ki pump ba lah ban rah bad ban pynthikna ïa ka jingtreikam jong ki ha ka por kaba biang ryngkat bad ki briew kiba biang, la ong ka kyrwoh ba la pynmih da ka MCD.
La pynpaw ruh ïa ka jingdonkam ban pynkhuid lang ïa ki nala um jong ki Colony da ki tnad Engineer bad pynkhuid, ryngkat bad ki lad ki lynti ban pynbeit ïa ki jingeh hapdeng ki tnad ha ka kyrdan Zonal lane ban pynkiew ïa kita sha ki jaka treikam ba kongsan, haba donkam.
Shuh shuh, ki heh ki la ban jur ïa ka jingdonkam ban leh stet ïa ki jingujor kiba ïadei bad ki jingtei kiba shyrkhei ha ka por tlang, ka jingpynkhuid kaba jylliew lyngba ki mashin bad ki briew, ka jingpynbeit ïa ki jaka ba lah ban shah ktah ha ki jaboh bad ban thaw ïa ki jingthmu kiba jrong por ban pynduhjait ïa ki.
Ka jingkhuid jingsuba sawdong ki jaka niam bad ki jaka lum jaboh ba ar bad kumjuh ruh ka jingsumar ïa ki Park bad ka jingkhuid jingsuba jong ka jaka baroh kawei ruh ki long napdeng ki phang ba la ïakren.
Katkum ka kyrwoh, ha kane ka jingïalang la wan ban ïashim bynta da baroh ki Additional Commissioner, ki Deputy Commissioner jong baroh ki Zone, ki Engineer-in-Chief, ki Assistant Commissioner jong ki Zone, ki Engineer na ki tnad Maintenance, Building, Projects bad EMS nalor ki Sanitation Superintendent bad kiwei ki heh ophisar jong ka MCD.
Ka jingïalang ka la pynleit jingmut ha kaba bishar bniah ïa ka jingpynkhreh jong ka MCD na ka bynta ka aïom Lyiur ka ban sa wan, da kaba pynleit jingmut khamtam eh ha kaba weng ïa ka jingtuid um, ban pynbha ïa ka jingkhuid jingsuba bad ban pynthikna ïa ka jingshngaiñ jong ki paidbah, la ong ka kyrwoh.
Ha kane ka jingïalang, ki Deputy Commissioner, ki Engineer-in-Chief bad ki Additional Commissioner ki la ai ïa ki plan treikam kiba bniah kiba thmu ban pynduna ïa ka jingtuid um ha kylleng ka nongbah.
Ki la ai jingmut ruh ban pynkhlaiñ ïa ki jingtei, ban pynbun ïa ki marpoh khyndew bad ban pynbun ïa ka bor briew ban pynthikna ïa ka jingpynbeit kaba paka bad kaba biang por ïa ki jingeh kiba ïadei bad ka jingkhriat.
Ki heh ki la ïasam ruh ïa ki jingshem jong ki ha ka lyngkha, da kaba pynpaw ïa ki jingeh ba kongsan, ki jingeh ha ka jingtreikam bad ka jingdonkam ban pynbha ïa ka jingïatreilang khamtam ha kaba ïadei bad ka jingpynkhuid ïa ki nala um bad ki jingeh jong ka jingtuid um.
U Kumar u la pynthikna ïa baroh ki tnad ïa ka jingkyrshan kaba donkam bad u la ban jur ïa ka jingdonkam ban leh ïa ka kam ha ka por kaba biang bad kaba ïadei.
U la pynpaw biang ïa ka jingdonkam ban don ka jingkitkhlieh, ka rukom treikam kaba shimkhia ban pynbeit ia ki jingeh bad ka jingmut jingpyrkhat kaba pynshong nongrim ha ki nongshong shnong ha kaba pyntreikam ïa ki kam kiba ïadei bad ka jingkhriat.U MCD Commissioner u la pynshlur ruh ïa ki jingtyrwa kiba lah ban leh, kiba don ha madan kiba thmu ban pynkhlaiñ ïa ka jingpynkhreh ïa ka jingwan ka aïom bad ban pynbha ïa ka jingkhuid jingsuba ha kylleng ka nongbah.
U la ong ba ka bor synshar ka long kaba kloi ban kyrshan ïa kum kine ki jingthmu bad ka kloi ban ai jingbit ïa ka pisa kaba donkam na ka bynta ki projek kiba weng ïa ki jingeh kiba kyrkieh bad kiba wanrah ïa ki jingkylla kiba lah ban ïohi ha ka por Lyiur.
Nalor kata, ka Civic Body ka la thung ïa ki Nodal Officer na ka bynta ban pynkhuid ïa ki nala um kiba heh kiba jylliew palat ïa ka saw phut ha kylleng ki Zone bapher bapher ha ka sor. La thung ïa ki Nodal Officer na ka bynta kawei pa kawei ka nala um ban pynthikna ïa ka jingkitkhlieh bad ban pyndep ïa ka kam pynkhuid um ha ka por kaba biang.
Ka MCD ka la thung ïa ki Engineer rit bad ki nongïarap Engineer kum ki Nodal Officer ban pynbeit ïa ka jingïatreilang bad ban pynsuk ïa ka jingpynbeit ïa ki jingeh jong ki paidbah.
Ha ka aïom Lyiur ha u snem ba la lah, ka jingjia kaba sngewsih ka la jia ha kawei ka Coaching Centre ha Old Rajinder Nagar, ha kaba lai ngut kiba thmu ban leh ïa ka UPSC ki la duh noh ïa la ka jong ka jingim hadien ba ki la ngam jyllop ha ka jaka ba la dap da ka um.
La ïathuh ba katei ka jingshlei um ka dei namar ka jingshlei jong ka nala um bad ka jingbym don ki lad pyntuid um kiba biang bad ki lad jingïada hapoh katei ka jaka.
