New Delhi, ïaïong:
Kumba la khmih lynti la ong ba ka jingshit kan leit biang sha ki bynta jong ka thaiñ Shatei-Sepngi bad ka bynta ba marpdeng jong ka India, katba u slap uba rit haduh uba jem ryngkat bad ka jingbeh ka lyer bad u slap bad ka ‘leilieh kan sa jia ha kine ki khyndiat sngi ban wan, la ong ka tnat India Meteorological Department (IMD).
Ki jaka kiba lah ban mad ïa ka jingshit ki long ha Vidarbha naduh mynta ka sngi ka 21 tarik haduh ka 23 tarik, Ïaïong, Shaphang Shathie jong ka Uttar Pradesh bad Madhya Pradesh haduh ka 24, tarik, Ïaïong, Rajasthan bad ha South Haryana ha ka 23 bad 24 tarik, Ïaïong.
Katkum ka jingïathuh jong ka IMD, ka jingkiew suki suki jong ka jingshit kaba jur tam da 2-3°C ka lah ban long ha ka thaiñ Shatei-Sepngi jong ka ri ha kine ki khyndiat sngi ban wan, khlem da khmih lynti ïa ka jingkylla kaba khraw ha ki ar sngi ban wan.
Ha ki bynta ba marpdeng jong ka India bad Gujarat, ym shym la khmih lynti ba kan don ka jingkylla kaba khraw ha ka jingshit kaba jur tam ha ki 24 kynta ban wan, bud sa ka jingkiew suki suki kaba 2-3°C ha ki hynriew sngi kiba hadien.
Ha East India, ka jingshit kaba heh tam ka lah ban kiew suki suki da 4-6°C ha ki saw sngi ban wan.
“Ka jingshit kaba jur kan kiew mynta ha ka thaiñ Shatei-Sepngi bad ka bynta ba marpdeng jong ka ri namar ba ka jingkylla ki bor ka mariang na Western Disturbance (WD) ka la ïaid noh. Ka rukom treikam ka la long kaba jur bha bad ka la wanrah ïa ka jingjur jong ka lyer beh slap ha ryngkat u slap uba jur ha ki jaka lum hynrei mynta la khmih lynti ba kane kan sa nang jur shuh shuh ha kine ki khyndiat sngi ban wan. Ha ki bynta ba shaphang Mihngi jong ka India ruh, ki la don ki jingeh jong ka lyer bad u slap bajur hynrei ka la sangeh noh namar ka jingkiew kynsan jong ka jingshit,” la ong Director General jong ka IMD u M Mohapatra.
Ka la don ka jinghap slap kaba pdeng bad kaba jur bha ha ki bynta jong ka Jammu & Kashmir bad Himachal Pradesh ha ka sngi Saitjaiñ.
U slap uba jur uba la wan ryngkat bad ka jingbeh jong ka lyer ki la nang ktah jur ïa ki bynta bad ki jaka baroh kiba don ha Jammu & Kashmir, Ladakh, Gilgit-Baltistan, Muzaffarabad, Himachal Pradesh, Uttarakhand, Punjab, Haryana, East Uttar Pradesh. India, Kerala & Mahe, Tamil Nadu, Puducherry, Karaikal, Interior Karnataka, Coastal Andhra Pradesh, Yanam, Rayalaseema, bad Telangana.
La ïathuh ruh ba ka jinghap jong u phria ka la long ha ki jaka ba kyrpang halor ka Odisha, Jammu & Kashmir, Ladakh, Gilgit-Baltistan, Muzaffarabad, Tamil Nadu, bad katto katne kiwei pat ki jaka.
