Shillong, Ïaïong 21
Ka All Meghalaya Karate -Do Association (AMKA) ka la sdang ïa ka pro-kram ai jinghikai kaba hynriew sngi ïa kaba la tip kum ka Intensive Karate Kumite Training Camp 2025 ha ka Lah Sngi U Blei ha Commu-nity Hall jong ka Dorbar Shnong Mawkhar.
Ha kane ka program la wan ban ai jinghikai da u khlur ïalehkai ka ri India, u Pranay Sharma uba la khur takma ksiar haduh hynñiew sien ha ka ri, kumjuh ha ka Commonwealth, South Asian, WKF Series A bad ha ka Khelo India.
Kane ka long ka sien kaba nyngkong eh ba ka AMKA ka la pynlong ïa kum kane ka prokram ïalehkai kaba shi bynta ka jingïarap kaba khraw ïa ki khynnah ba kin long kiba pynleit jingmut ha kane ka jingïalehkai khnang ba kin nangkiew shaphrang bad ha kawei ka sngi kin long kiba paw bad tyngshaiñ kum ki khlur ïalehkai jong ka ri.
Kane ka program ka long ruh shi bynta ban pynkhreh ïa ka 39th National Games ka ban long ha Jylla Meghalaya ha u 2027 lem bad kiwei ki lympung ïalehkai ki ban sa long mynta u snem 2025. Te kumta ki khynnah kiba la wan shah hikai ha kane ka prokram ki don 80 ngut naduh ki Sub-Junior, Junior bad haduh ki Senior.
Haba ai jinghikai ha kane ka sngi, u Pranay u la ïasam ïa ki buit ïaleh -kai sha ki khynnah kumno ban kin long kiba pynleit jingmut haba ki don hapdeng ka jingïa-lehkai bad ban ym ailad ïa ki nongïalehkai ka liang pyrshah.
Haba pynpaw ha U Nongsaiñ Hima, u General Secretary ka AMKA, Bah Ksankupar Warjri, u la pynpaw ba kane ka die ka sien kaba nyngkong eh ba la pynlong ïa kane ka prokram ai jinghikai na ka bynta ki khynnah. Ha ka jingshisha ki don bun ki khynnah, hynrei ngi la hap ban shu jied noh tang 80 ngut ki khynnah naduh ki Sub-Junior, Junior haduh ki Senior ba kin ïoh ka jingshah hikai.”
“Ïa kine ki khynnah rit ngi khot khnang namar kan sa don ka lympung ïalehkai Sub-Junior bad Cadet Junior ka ban long ha Uttara-khand naduh 12 haduh 15 tarik u Jylliew. Kane ka jingwan shah hikai ka long ba kin ïoh shuh shuh ïa ki buit ïalehkai bad kin lah ban pynpaw ïa ka jingtbit bad ban ïalehkai kham bha ha katei ka lympung.”
“Kaba kongsan eh jong kane ka prokram ai jinghikai ka long ba kum ka Jylla kan pynkhreh ban pynlong ïa ka 39th National Games ha u 2027. Te kumta kane ka long kawei na ki sien jam ba kum ka synjuk ka la pynlong bad nangne shakhmat ngin dang ïai bteng ban pynlong ïa kum kine ki prokram,” u la bynrap.
Ha kane ka prokram la wan ïasoh lang ruh da katto katne ngut ki rangïa -lehkai na ka kynhun shipai jong ka Assam Regimental Centre. Ïa kane ka prokram ai jinghikai yn pynkut ha ka sngi Saitjaiñ.
