Washington, Jymmang:
Ka United States ha ka Sngi Palei ka la kyntu ia ka Iran, ba kan pyllait ia ka nongioh khusnam ‘Nobel Peace’, ka Narges Mohammadi, hadien ba ki nongkyrshan jongka, ki la maham halor ka jinglah ban don jingktah ia ka met- ka phad bad ka jinglong- jingman jongka bad lada jia kaei- kaei ia ka, ha ka por ba don hapoh ka jingtohkit, kin wanrah jingkulmar bad kin ïakhun naka bynta jong ka hok jong katei ka briew.
Ka Mohammadi, ka la don 54 snem ka rta, ka long ruh ka nongiakhih hok longbriew- manbriew bad ka la shong patok la kumba 20 snem bad la bna ruh ba ka la kem pang la arsien namar ka don ia ka jingpang kyndit ha kine ki taïew ba la dep.
Ka America bad ka Israel ki la hiar thma ia ka Iran ha ka 28 tarik u Rymphang. Ka Mohammadi ka la kynthoh ia ka thma pyrshah ia ka ri jongka, da kaba ong ha ka por ba ka Israel ka la leit thombor dusmon ha u snem ba la dep, ba katei ka jingleh donbor, ka la ktah jur ia ki riew paidbah bad ka pynskhem tang ia ka ri jong ki Lyngdoh niam.
La kem biang ia ka ha u bnai Nohprah, hadien ba ka la pynrem ia ka ri Islam ha ka jingleit ontep ia u nongiasaid aiñ.
Ka ri America hapoh ka jingsynshar jong u President Donald Trump kam shym la kren bunsien halor ka hok longbriew- manbriew, ka ïohi ïa kane ka mat kum ka mat ba kongsan ban ialeh pyrshah ïa ki nongshun hynrei kaba kham bunsien ka ju wanrah ia ki mat jingkynthoh pyrshah ïa kito ki ri kiba ïatylli bad ka sorkar Republican.
