Washington, Jymmang:
Ka United States ha kane ka sien, ka la pynngat kyndon ia u Symbud Myntri jong ka tnat khaïi umphniang ka Iraq halor ka jingleit ai jingkyrshan ia ka Iran. Kane ka long hadien ba ka US ka la pyrshang ban pyni bor bad ban pynbor ruh ia ka Iran ba ka dei ban kohnguh ia ki jingtyrwa jongka.
U Symbud Myntri, U Ali Maarij al-Bahadli, “u la pyndonkam bakla ia ka kyrdan jong u, ban pyntreikam ia ka umphniang Iraq, da ka jingthmu ban ai jingkyrshan ia ka Iran bad ki kam lehnoh jong ka”, la ong u nongai-ktien jong ka State Department, u Tommy Pigott.
Ka America ka don ki jingpynjari kiba pyrshah ia ka umphniang Iran, kiba la buh khnang ban pynshitom ia kano- kano ka ri ne ka kompeni kaba thied ia um ka phniang jong ka Iran.
Ka Iran, kaba la ïalam da ki lyngdoh niam Shia, ka don ka jingïadei kaba jan bha bad kiba bun ki nongïalehkai ba kongsan ha Iraq, kaba bun paid ki Shia, naduh ka jinghiar thma jong ka US ha u snem 2003, kaba la pynhap noh ïa u Saddam Hussein.
Ka America ka la nang pynjur ïa ka jingpynbor ïa ka jylla Iraq ban pynsangeh noh ïa ka jingkynnoh ba ka don ka jingïatreilang bad ki kynhun Shia Iraq kiba don tiar ïaleh kiba ïadei bad ka Iran.
Naduh ba ka America bad ka Israel ki la hiar thma ia ka Iran ha ka 28 tarik u Rymphang, ki seng kieng atiar ki la hiar thma ia ki jaka treikam jong ka US ha Iraq palat 600 sien shwa ban pynbna ia ka jingsangeh iasiat, ong u heh jong ka US.
Une u heh sorkar u la ong ba ka America ka dang wad ïa ki rai ba tikna jong ka Iraq ban kyntait noh ïa katei ka ri lehnoh (Iran) shwa ba ka US kan sdang biang ïa ka jingïatreilang kaba pura.
Ha ka por jong ka thma Iran, ka America ka la pynsangeh kyrpang ïa ka jingshalan pisa sha Iraq na ka Federal Reserve Bank jong ka New York, kaba la pynïaid ïa ka khajna umphniang jong ka ri ha ka jingpynbeit kaba la sdang naduh ka jingwan hiar thma jong ka US.
Ha ki por ba la leit, u President Donald Trump, u la pynpaw ka jingkyrmen ban ïatreilang bad u Ali al-Zaidi, uba la shah jied kum u Myntri Rangbahduh jong ka Iraq, uba la shah jied da ka kynhun synrop kaba synshar, hadien ka jingpynbor kaba jur jong ka US, pyrshah ïa u nongïakhun ba hakhmat eh.
