D H Kharkongor
Nga la ju ong teng ba kiei kiei baroh ki don la ka jong ka khubor, ba kin ïathuh. Ki khubor ki ban pynïar naduh ïa ka jingtip tad haduh ïa ka bor sngewthuh. Ka shong pat de ha nga ha phi la ngi don ne em ïa ka por ba ngin peitthuh lane ba ngin sngapthuh. Namar ka jingbunkam than eh ba ngi kum duh noh ïa ki khubor kiba pynmyntoi, kiba ki shibun kiei kiei ki don ban ïathuh.
Kiei kiei baroh ki don ïa la ka ka jong ka khubor ba kumta peitthuh bad ïoh jinghikai ine jingmyntoi na ki. Kum ka nuksa ba tang na ki ‘Photo Album’ kiba la rim shwa ruh ngin ïoh shibun ki jingtip kiba ïadei bad ka mynnor. Tang na ki ‘Black & White Still Photos’ shwa ruh ngi lah ban sngewthuh ïa ka rukom riam ka rukom beit kaba mynnor. Ka rukom long jong ki ïing ki sem kiba mynnor. Ki jait tiar ki jait tar kaba ki mynnor ki pyndonkam bad kumta ter ter. Haduh mynta mynne ki dang don, hangne bad hangtai, kiei kiei kiba long kum ki ‘dak’ lane kum ki ‘shap’, kiba naduh mynnor, kiba da don jingmut ne kiba don ïa ka jingthmu kaba kyrpang.
Ka durkhmat, ka rukom ïaid ka rukom ïeng bad wat ka rukom riam ka rukom beit ne ki jainphong ki don ha ki ïa la ka jong ka khubor ban ïathuh.Te kumta to da ithuhshai ïa kiei kiei baroh kiba phi ïohi shynna.To da shah shkor bha bad to da sngewthuh shai ruh de ïa kaei kaei kaba phi ïohsngew kyndiang. Kumta to da ithuh bad to da sngewthuh, ïa kiei kiei baroh, wei ba U Blei u lah ai kyrpang ïa nga ïa phi tad naduh ïa ki shijur ki khmat tad haduh ïa ki shijur ki shkor. Ha kaba ïadei bad ka khmut ba wat ki thliewkhmut ruh u da buh kyrpang haduh shijur. ïa ka Syntur lem bad u Thylliej Khlem Shyieng, u jong ka te, u da ai kypang beit thik tang kawei. Kaei kaei kaba da kit jingmut bha.
Kumta kam long kaba eh ban ithuh ïa kaei kaba u briew u mad ne u shem ne u ïa kynduh, ha ka jingim ka jong u kaba man la ka sngi. Lah ba ong ba tang na ka durkhmat ka jong u shwa ruh ba lah ban ringdur ïa kata kaei kaei.Wat ka met ka phad ne ka rukom khihkti khihkjat ruh ka don la ka khubor ban pathai. Kam long kaba eh ban ithuh ïa ki dak ki shin jong ka jingïaikhuslai mynsiem, ka jinglyngkhum ka jingmut ka jingpyrkhat ne ka jingsngewkut lad kut lynti lane ka jingsngewduh jingkyrmen. Kam long ruh kaba eh ban ithuh ba, ïa u, la ban khia ka jingdiaw mynsiem ne ka jingsngewsihkthang. Kam long kaba eh ban ithuh ba hangta hapoh jong u ka don ka jingthylli.
U briew um dei u jingthaw uba lah ban im beit thik tang weibriew. Kumta u dei u jingthaw uba angnud, na ki parabriew ne na ka imlang ka sahlang, ïa ka jingithuhlem kaba ha ryngkat ka jingkheiñ kor ne kheiñ briew. Kum ban shu ong noh u donkam ïa ka ‘Social Acceptance’. Ym duh pat ruh uba da kwah tam ne kwah rhah. Uba da khmih lynti syndon ba ka imlang ka sahlang hi baroh kawei kan ithuhshai kdar ïa u ba u dei uba kham kynsai ban ïa kiwei. Uba da khmih lynti ruh de ba ka imlang ka sahlang kan pdiang bad kheiñ ïa u ba u dei uba kam halor ban ïa kiwei. Ka dei kaba kum kata ka jingangnud kaba lam ïa u wat shaduh ka jingkum rhah seh ne ka jingkumrhah biej naduh ïa ka spah (Wealth) tad haduh ïa ka kyrdan (Status) lem bad ka bor (Power). Uba kum pyrkhat ba un nym lah ban ïoh ïa ka tynrai jong ka jingangnud ka jong u lymda u don ïa ka spah bah, ka kyrdan lem bad ka bor. Uba wei briew u sngewthylli khlem kita kiei kiei. U bym don ïa ka jinghun mynsiem ne ka ‘contentment’.
Ngi don namar kata ïa ki ‘Big Ego’. Kiba halade ki sngewmat kat ki te ym don shuh. Kiba ka rukom ïaid ka rukom ïeng ne ka rukom im kaba kum ban ong “Hei! phi baroh, hato phim ithuh sieh mo ïa nga ? Ohh ! balei, phim pat ju ïohsngew sieh mo shaphang jong nga ? Phim tip sieh mo nga dei uei?” Kum ban shu ong noh kiba la ha kano kano ka khep, kampher la ka dei ka kmen ka sngewbha ne ka sngewsih kthang, ki da thmu ruh thik bad sak sha ka kamra kaba kham kyrpang.Ym tang kumta hynrei tad haduh ïaka jaka shong kaba kham kyrpang. Kiba da khmih lynti ruh de ïa ka ‘jingburom kyrpang’ na baroh kiba ïadonlang hangta. Ngi don ruh de ïa ki ‘Big Ego’ kiba ha kajuh ka por ki dei ruh ki ‘Flashy Harry’. Kiba da kynjwain shisha ka riam ka beit, kaba kynsai bad kaba rem dor, kaba tad naduh narum ryndang tad haduh ha kjat. Kiba da kynjwain pat de ruh tad naduh dang shu mar ïa khiethiah tad haduh ynda shwa ban kiew biang ha ka jingthiah. Ki ‘Flashy Harry’ kiba ïasyriem pynban thik kum u ‘Mannequin’, kata, ‘all looks but no brain’ ne kiba ‘ka riam ka beit te lah I hun shisha katba ka jabieng te dang duna’. Kiba khmih lynti pat de ba baroh kin ïamynjur bad ki ñia ki jutang ki jong ki, kiba ïasyrien pynban pat de kum ka ‘jingtied tyrnem ha suiñ’.
Te to yn bishni yn pihuiñ lei ïa kata ka jinglahbor ban don ïa ka ‘Audi A4’ lem bad kata ka ‘Toyota Innova’. Kiba nalor kata ka Scorpio. Yn dang ïasngewphylla ruh lei ba kwah ban da don, nalor kaba lahbor ban don, tad haduh 12 (khatar) ngut ki nongpud pahara.Yn phylla lei naba lehse don lut ïa kat kaba lah ban paw shabar katba shapoh te thylli. Kaba sngewphylla ka dei kata ka jingriam ka jong ki nongbud, kaba baroh shirynnieng, da ki jainrong ïong. Kaba katno tam kata ka jingdon ka jong kita ki ‘Air Gun’ bad ki ‘Air Pistol’ kiba kham kynsai, kiba kum ki atiar ïaleh, kiba lem bad ki ‘Magazine Pouch’, ki Walkie-Talkie Set’ bad ki ‘Tactical Vests’. Kaba kham pynlynngoh bad kham pynsuba sniew ka dei kata ka jingbym don jong ka Audi A4 bad ruh ka Toyota Innova la ki ‘Registered Number Plate’. Kaba katno tam haba ki dei ruh kiba bad ki ‘Tinted Glasses’ ne ki ‘ïitiong’. Kawei na ki lei te kaba la pyndaitsyndon bad ka ‘Siren’. Namar kata ym lah khlem sngewlyngngoh u tieng u smiej ïano eh, ne ba u don pynban ïa ka jingthmu ban pyntieng pynsmiej ïa baroh. Ngi don shisha, hapdeng jong ngi, kiba dei pynban ki VIP (Very Idiotic Person).
