Shillong, Risaw 17
U MLA ka West Shillong, u Bah Paul Lyngdoh ha kajuh ka por ruh u nongaibuit ka tnad Social Welfare ka Sorkar Jylla u la leit jurip ïa ka jaka ïeng kali Ri-Bhoi kaba don ha Garikhana, ban peit pyrman ïa ka jinglong jingman katei ka jaka.
Ha kane ka jingjurip u Bah Paul, la ïadonlang ki ophisar ka tnad Municipal Board, tnad Pulit, ka synjuk ki shiphew dorbar shnong, ki ophisar ka MUDA bad kiwei-kiwei de.
Ha ka jingjurip mar shu poi ha jaka ïeng kali ha Garikhana, ki rangbah ki la pynsngew ha u Bah Paul ha ka jingdonlang ki ophisar ka MUDA, ba ha katei ka jaka bad kynthei bad shynrang ki ïa thiah bad sah miet.
Ha katei ka jingïakren la ïoh sngew ba ki rangbah ki la pynpaw ruh ba kane ka dei ka ktem bah ba ki kynthei bad shynrang ki ïa sah miet bad lada kim pat shna pynbha kan sa jur arshah ki kam sniew.
Kumta ki la bthah ïa ki ophisar ka MUDA, ba kin pyntrei bha noh ïa katei ka jaka ba pynlong jaka thiah bad jaka sah miet ki briew.
Shuh-shuh ki la ong ba lada kim pat lah ban shna pynbha ruh kin sngewbha ban ker dam noh shwa, khnang ba ki briew kin nym ïoh lad shuh ban leit thiah ne sah miet ha katei ka jaka.
