Shillong, Naiwieng 06
Ka kynhun ki nongïalehkai Kudo hapoh ka lama jong ka Kudo Association Meghalaya ka la wanphai sha la ïing ryngkat ki takma ba ki la khur ha ka lympung ïalehkai 16th Kudo National Tournament 2025-2026 kaba la long ha Surat bad kumjuh ha ka 6th Kudo Federation Cup bad Akshay Kumar 17 International Kudo Tournament 2025-2026.
Na ka liang kane ka synjuk la jied haduh 20 ngut ki rang bad ki ‘thei ïalehkai, hynrei san ngut ki la duh leit shim bynta na ka daw jong ka jingbym ïoh ki lad jingïarap pisa. Te kumta ki la don tang 15 ngut kiba la leit shim bynta bad 7 ngut ki la lah ban pynurlong ha ka ban khur takma na ka bynta ka Jylla.
Te kumta u Ferdinand Nongdhar u la ïoh ban khur kawei ka takma ksiar bad kawei ka takma rupa, kumjuh ka Ibalakordor Umdor ka la ïoh lai tylli ki takma rnong, ka Ïarisha Nongphlang, u Damonlang Myrboh, Alfred Papeng bad ka Ribhalin Marbaniang ki la khur mar kawei ka takma rnong, katba u Pynchemlutimi Suchiang u la ïoh kawei ka takma rupa bad kawei ka takma rnong.
Haba kren bad ki nongthoh khubor u President ka Kudo Association Meghalaya u Bah Pynshai Mawrie u la ïathuh ba ka kynhun ha la i jong i bor ibarit, ka la pyrshang ban ïalam ïa ki khynnah ban leit shim bynta sha ki rynsan ïalehkai bapher bapher na ka bynta ki khynnah.
U la iathuh ruh ba ka seng ka la ai da ka jingthoh sha ka sorkar ba kan ithuh noh ïa kane ka synjuk jong ki khnang ba ki khynnah kin ïoh jingïarap lada ki mih ban leit ïashim bynta shabar jylla.
U la ong ruh ba kumba long mynta ki khynnah kiba shah hikai ha ka kynhun jong ki, ki dei kiba wan na ka longïing kaba duna ka ïoh ka kot bad haba ki leit ïashim bynta, ki kmie ki kpa ki hap ban shim wat da ka ram ruh tang ba ki khun jong ki kin ïoh lad ban mihkhmat ïa ka Jylla.
Na ka liang ki khynnah kiba ïoh takma ki la pynpaw ka jingsngewnguh ïa ki nongkyrshan kiba la noh synñiang bad plie lad ïa ki ban ïoh leit shim bynta. Ki la ïathuh ruh ba lyngba kane ka lympung ki la ïoh shibun ki jinghikai bad ki don ka jingkyrmen ba ha kiwei pat ki jingïakop kin lah ban nangïai kiew shaphang na ka bynta ban wanrah burom ïa ka Jylla hi baroh kawei.
