Jowai, Naiwieng 11
Ka Shilliang Umshong SC ka la pynliem noh ïa ka Dhana CSC da 3-1 kol na ka bynta ban khur ïa ka jingjop ha ka Super Division na ka bynta ka 5th Kyrmen Shylla Contribution Trophy 2025 ba la pynïaid da ka East Jaiñtia Hills District Sports Association (EJHDSA) ha ka sngi Ba-ar.
Ïa kine ki kol la thep da u Lhunminthang Thouthang ha ka minit kaba 2, kumjuh u Besterly Ksih (48) bad u Intelligent Rymbai (90+1), katba u Dibok Lawai (50) u la pynphai kylla shi kol na ka bynta ka Dhana.
Haba phai sha kawei pat ka jingïakhun hapdeng ka R.Shken-shynriah SC bad ka Diengshynrum SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Kumba ka paw haduh mynta ka Sutnga SSCC ka danglong ka kynhun kaba danglamkhmat ha kane ka lympung ha kaba ka la kamai 12 poiñ na ki san sien ïakhun, ha kaba la bud pat sa ka R.Shkenshynriah SC kaba la wan ba ar bad kamai 11 poiñ. Ka Diengshynrum SC ka la bat ïa ka kyrdan ba lai bad 10 poiñ.
Ka Shilliang Umshong SC ka la kiew pat sha ka kyrdan ba saw hadien ka jingjop jong ka bad ban kamai 7 poiñ. Ka Thangskai Tiger kaba long ka lahduh ha ka aïom ba la lah (2024), ka la bat ïa ka kyrdan ba san bad kamai 7 poiñ. Ka Ladrymbai B kaba don ha ka kyrdan ba sha trai duh da kaba kamai tang shi poiñ na ki san sien ïakhun bad ka la don ha ka line saw (relegation zone) ban shah pynhiar kyrdan ha kane ka aïom ïalehkai.
