Shillong, Naiwieng 12
Sa shisien pat ka Rangdajied United FC bad ka Shillong Lajong FC kin pynkhreh ïa ka jingïakhun final na ka bynta ban ïaknieh ïa ka nam lahduh ha ka SSA Super Cup 2025 ka ban long ha ka sngi Palei ha ka por 5 baje janmiet ha SSA Stadium kaba ha First Ground, Polo.
U Myntri Rangbah ka Jylla u Conrad K. Sangma ryngkat u Myntri ka tnat ïalehkai u Bah Wailadmiki Shylla kin wan ban sakhi lang ïa kane ka jingïakhun final.
Kumba ka paw kine ki klob ki dei kiba la ju ïakynduh bun sien ha ki jingïakhun final ha ki snem ba la leit ha ka Shillong Premier League, Meghalaya State League, Durand Cup ne wat haduh ka I-League.
Pynban ha kaba kut ka nam jop hapdeng jong ki ka leit sha ka kynhun ïalehkai ka SLFC, hadien ba ka la lah ban jop ha ka jingïakhun SPL ha u 2024, nangta ha ka Durand Cup bad kumjuh ha ka MSL, hynrei lait noh pat mynta ka snem ha ka SPL kine ki kynhun ki la kut ha ka jingïakhaid khlem da lah ban thep kol.
Ha kane ka samoi ïalehkai ba mynta, ka RUFC ka la lah ban bat ïa ka kyrdan ba hynriew ha ka miej ïakheiñ poiñ jong ka SPL, hynrei ka la lah pat ba kan jam sha ka phainal jong ka Super Cup hadien ba ka la jop ha ka semi final pyrshah ïa ka lahduh jong ka SPL 2025 ka Langsning da 2-0 kol. Kine ki kol ki la wan urlong lyngba u Stephanson Pale, katba na ka liang ka SLFC, ka la jam sha ka phainal hadien ka jingjop ïa ka Mawlai SC da 1-0 kol.
Khyndiat kaba kham itynnad bad kaba donkam ban pyrto hangne ka long ba ki khynnah ka RUFC, ki la lah ban kiew bad paw bha katba nangïaid sha-khmat ka samoi ïalehkai mynta ka snem, kampher ba ha ka por kaba sdang jong ka SPL, ki la shem jingeh ban ïalehkai bha.
Ha ka por ka jingïakhun ïa ka ‘play-off’ pyrshah ïa ka Nangkiew Irat, ka RUFC ka la jop da 3-0 kol bad hadien ka la lah ban pynliem sa ïa ka Langsning FC.
Haba phai sha ka SLFC, ha ka jingïakhun pyrshah ïa ka Mawlai ha ka semi final, khyndiat ka kham hiar ka rukom ïalehkai, hynrei u Wanteilang Malngiang u la lah ban ïalehkai bha bad um shym la ailad ban shah thep kol na ki hynriew sien ïakhun kynthup naduh ka SPL bad ka Super Cup, hynrei kam shym la lah ban pynurlong ban rah ïa ka nam lahduh ha ka SPL.
Kumta, ka phainal jong ka Super Cup kan nym kut tang ha ka jingïakhun hapdeng kine ki ar kynhun, hynrei yn sakhi ruh ïa ka jingsdang ban mihpaw sa shi kynhun ki khynnah ïalehkai ki ban long ka lawei bad ka jingkyrmen ïa ka Jylla.
