Itanagar, Nohprah:
Ka jingwad bad pyllait im kaba jur ka la nang bteng hynnin ka sngi hadien ka jinghap jong kawei ka trok sha riat bah ha ki bynta jong ka surok Hayuliang-Chaglagam, jong ka Arunachal Pradesh ha kaba la don ka jingantad ba ki la don kumba 18 ngut ki briew kiba la ïap.
Kane ka jingbteng ïa ka jingleit wad ïa ki briew kiba dang sahkut shapoh trai riat ka la long da ka jingïarap jong ki shipai ka tnat Indian Army.
Ka jingpyntreikam ka la sdang hadien ba uwei uba lait im marwei u la poi ha Chipra GREF Camp ha ka por janmiet jong ka 10 tarik u Nohprah bad u la pyntip ba kawei ka trok kaba kit 22 ngut ki nongtrei na Tinsukia ka la hap ha ka lyhuh ba jylliew ha ka miet jong ka 8 tarik u Nohprah.
Ym shym la poi kano kano ka jingtip jong ki bor synshar shnong, ki kontraktor ne ki nongmihkhmat paidbah halor kane ka jingjia tad haduh ba une u briew uba lait im un wan shakhmat.
Ka Spear Corps ka la pynpoi bun tylli ki kynhun ai jingïarap, ki kynhun sumar, ki nongtrei ka GREF, ki pulit ka thaiñ, ki briew jong ka NDRF bad u ADC Hayuliang ha ka por mynstep hynnin ka sngi. Hadien saw kynta jong ka jingleit wad ha ryngkat ki tyllai, kine ki kynhun ki la lap ïa ka kali ha trai jong ka riat kaba jrong da kumba 200 meter na ka surok.
Ha kane ka por la ïohi ïa 18 tylli ki met ïap ha katei ka jaka, bad la sei noh ïa ki baroh. U ADC Hayuliang u la pyntip sha u SP Anjaw, uba la poi ha katei ka jaka, katba u District Medical Officer u dang ïaid ban ïapynbeit ban pynpoi ïa kiba mynsaw bad ïa kiba khlad ha ka jingjia.
Ki kynhun jong ka SDRF kiba la shah hukum ha u Deputy Commissioner ba kin leit sha katei ka jaka.
