Kane ka dei ka rukom kheiñkur kheiñjait ha ngi ki Khasi. Shikur ki kheiñ na ka jait ka kynja jong ka kmie ne na u symbai jong u kpa. Namar ha ka jingshisha haba dei na ujuh u symbai (Blood Relationship) bym bit ban ïa shongkha namar ka dei kajuh ka snam ka ksuid. Ki khunkha kim bit ban leit shongkha ha ka ïing ka sem ka Meikha da leilei ruh.
Namar kane ka long ka sang ka ma kaba shyrkhei tam ha ka liang ka shongkha shongman. Para kajuh ka jait ruh ym bit wat lada ïa jngai na ka liang u symbai makna, namar la ñiew kum ki hynmen ki para. Ban ïa shongkha shipara kha ruh ym bit, wat la bun pateng makna. Kaba ïadei bad ka tingkur ne ïateh kur ym bit mo ban ia shongkha haba kheiñ jait shim jait ïa ka jong ka jong bym don jingïadei eiei wat na ka liang u symbai ruh.
Kito ki jait ba ïateh kur ne ïa dei kur kim lah mo ban ïa shongkha hapdeng jong ki. Haba ki shu ïa tingkur katba kim don jingïadei eiei ha ka shongkha shongman. Ka Meikha ka ñiakha ki ieit katta katta ïa la ki khunkha. Balei namar ka dei ka don ka snam la jong lyngba u symbai ba la ai.
Shikur ym bit shipara kha ym bit namar dang ïadei na kajuh ka snam hiarpateng jong u kpa ba ai symbai. Man ki jaitbynriew ki don la ka jong ka jong ka rukom kheiñkur kheiñjait.
Kaba sniew tam eh ha ka rukom ai jait kheiñ jait jong ngi ki Khasi ka long ba ïa ki khun na ki kpa bym dei Khasi la ai jait sha ka kmie kaba dei ka Khasi. Kane ka la pynduh bad pynsniew dur noh ïa ka jinglong nylla jong ka jait u Khasi.
C. B. Iawphniaw
