Shillong, K’Lyngkot 12
Ka Malki ka la pynliem noh ïa ka Nongkseh da 27 run na ka bynta ban khur jingjop ha ka lympung ïalehkai First Division Cricket League 2026 ba la pynïaid da ka Shillong Cricket Association ha ka lah sngi U Blei.
Ha kane ka jingïakhun ka Malki ka la shimti ban tied nyngkong ha kaba ka la kamai 139 run bad shah pynkhyllem baroh ki nongtied ha ki 39.2 over. U Nick Dann u la tied 35 run na ki 43 bol bad u Wellmanson Passah u la ïoh 34 run na ki 36 bol. Katba u Richmond Nongdhar u la khur 3 wiket bad ïa ki 2 wiket la khur da u Bushbashisha Tohtih na ka bynta ka Nongkseh.
Haba wan beh ïa ka thong ba la buh da ka liang pyrshah, ka Nongkseh ka la kamai tang 112 ruh hadien ba ka la shah pynkhyllem baroh ki nongtied ha ki 38 over. U Mickey Marngar u la tied 26 run na ki 50 bol bad u Banpynshngiñ u la ïoh 20 run na ki 33 bol. Katba u Deibormi Rangad u la khur 4 wiket bad ïa ki 2 wiket la khur da u Sylvester Mylliempdah. Ïa ka nam Player of the Match la khur da u Deibormi Rangad, uba la khur 4 wiket na ka bynta 26 run.
