Shillong, K’Lyngkot 12
Ka Lumparing SC bad ka Laitkor SC ki la lah ban pynthikna ban jam sha ka quarter final ha ka Women’s Football League 2026 ba la pynïaid da ka Shillong Sports Association (SSA) hadien ba ki la khur jingjop ha ka lah sngi U Blei.
Ha ka jingïalehkai jong ka Group-B ha SSA Stadium Polo, ka Lumparing SC ka la pynliem noh ïa ka Mawkasiang SC da 3-0 kol. Kane ka nam jop ka la wan urlong lyngba ki kol ba la thep da ka Chibasal Sangma ha ka minit kaba 32, kumjuh ka Catherene Kharkongor (69) bad ka Bahunlang Synrem (63).
Lyngba kane ka jingjop kaba lai, ka Lumparing kaba la kamai 9 poiñ, ka la jam sha ka kyrdan ba hakhlieh ha katei ka group da kaba ka la tam lyngba ka jingïapher ha ka jingthep kol ïa ka Pay For Right FA (9 poiñ).
Haba phai sha ka jingïakhun kaba ar, ka Laitkor SC ka la jop da ka ‘walk over’ pyrshah ïa ka Umrynjah SC kaba mut da 3-0 kol.
Te kumta ka Laitkor ka la bteng ban bat ïa ka kyrdan ba hakhlieh ha ka Group-A da kaba kamai 9 poiñ na ki lai sien ïakhun, katba ka Umrynjah ka dangïaryngkat mar 3 poiñ bad ka Nongthymmai, kiba dangdon hapdeng ka jingïaknieh na kane ka group.
Haba phai sha kawei pat ka jingïakhun jong ka Group-C hapdeng ka Nongrim Hills SC bad ka Kharang SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Te kumta kine ki kynhun ki dangïai sah ha ki kyrdan ba shatrai bad kiba la thikna na kane ka group ban rung sha ka quarter final ki long ka New Challenger bad ka Rangdajied United FC, kiba la kamai mar 6 point na ki ar sien ïakhun.
Ha ka sngi Ba-ar ka jingïalehkai kan long hapdeng ka Nongthymmai SC pyrshah ïa ka Mawshubuit SC ha ka por 10:30 mynstep bad ka Rangdajied United FC ïa ka New Challenger SC ha ka por 12:30 mynsngi.
