Shillong, K’Lyngkot 12
Ka Shibakha CC bad ka Shillong Sixers ki la jam sha ka quarter final ha ka Third Division Cricket League 2026 ba la pynïaid da ka Shillong Cricket Association hadien ba ki la khur jingjop ha ka lah sngi U Blei.
Ha kane ka jingïakhun pre-quarter final kaba la long ha madan Urkaliar, ka Shibakha ka la pynliem noh ïa ka Slog Warriors da 1 run. Ka Slog Warriors kaba la jop ïa ka kynting pisa, ka la ailad ïa ka Shibakha ban tied nyngkong ha kaba ka la kamai 131 run bad shah pynhap 7 wiket ha ki 20 over. U Means Machine u la tied 32 run na ki 17 bol bad u Khambor u la ïoh 41 run na ki 50 bol. Katba u Lokesh u la khur 1 wiket na ka bynta ka Slog Warriors.
Haba wan beh ïa ka thong ba la buh da ka liang pyrshah, ka Slog Warriors ka la shah pynkhyllem baroh ki nongtied bad ban kamai tang 130 run ha ki 20 over. U Lokesh u la tied 44 run na ki 26 bol bad u Rakesh Rai u la ïoh 34 run na ki 27 bol. Katba u Mean Machine (Player of the Match) u la khur 3 wiket bad ïa ki 2 wiket la khur da u Ben Mowthoh.
Haba phai sha kawei pat ka jingïakhun kaba ar, ka Shillong Sixers ka la jop da 6 run ïa ka Youth Stars. Ka Shillong Sixers ka la kam trai ban tied nyngkong ha kaba ka la kamai 195 run bad shah pynkhyllem 5 wiket ha ki 20 over. Kane ka la wan lyngba ka jingïalehkai bha u Sandeep Roy uba la ïoh ban khyrwit 61 run na ki 31 bol ryngkat bad u Fernandes Bareh, uba la ïoh 61 run na ki 46 bol. Katba u Mohit Sethi u la khur 2 wiket.
Haba wan beh ïa ka thong, ka Youth Stars ka la kamai tang 189 run bad shah pynhap 8 wiket ha ki 20 over. U Mrinmoy Das u la khyrwit ïa ka shiteng spah kaba 53 run na ki 30 bol bad u Kunal Chakroborty u la ïoh 39 run na ki 30 bol. Katba u Evert Mawlong u la khur 3 wiket bad ïa ki 2 wiket la khur da u Amit Singh. Ïa ka nam Player of the Match la khur da u Sandeep Roy, uba la kamai 61 run bad shim 1 wiket.
