Shillong, K’Lyngkot 12
Ka kynhun ki rang ïalehkai ka India kan ïakhun pyrshah ïa ka Bangladesh ha ka jingïalehkai kaba nyngkong jong ka SAFF Futsal Championship 2026 ha ka sngi Balang ha Nonthaburi Stadium kaba ha Nonthaburi, Thailand ha ka por 3:30 baje nohphai sngi.
U coach ka India u Reza Kordi uba la shimti ïa kane ka kynhun naduh ka AFC Futsal Asian Cup Qualifiers ha u Nailur jong u snem ba la dep, u la ong ba ka jingpynleit jingmut ka long kaba skhem halor ka jinglah ban ïakhun bad ka jingkiew kham shajrong.
U Kordi, uba na Iran, u la pynpaw ruh ka jingai khublei ïa ki nongpynïaid bad batai bniah ïa ka jingtei jong ka India. “Nyngkong eh, nga kwah ban ai khublei ïa ka SAFF bad ka Football Association of Thailand (FAT) namar ba ki la long ki nongpynïaid ba phylla. Katba ïa ka kynhun jong ngi, ngi la sdang ïa ka jingpynkhreh jong ngi kumba shibnai mynshwa ha Bengaluru. Ngi la wan sha kane ka jaka shi taïew shwa ka jingïalehkai ba nyngkong jong ngi bad ngi la ïalehkai ruh ar tylli ki jingïalehkai paralok.”
Hadien ka Bangladesh, ka India kan ïakhun pyrshah ïa ka Nepal (18 tarik), Maldives (20 tarik), Bhutan (22 tarik), Sri Lanka (24 tarik) bad ïa ka Pakistan (26 tarik), baroh kin ïakhun ha Nonthaburi Stadium ha Thailand. Ka kynhun ka ban khur jingjop ha kaba kut jong ki hynñiew tylli ki wat jingïakhun kan ïoh ïa ka nam lahduh ha kane ka lympung.
