Shillong, Rymphang 03
Ka lympung ïalehkai Meghalaya Day Open To All Tournament 2026 ka la poi sha kaba kut ha ka lah sngi U Blei ha Madan Biar ka Blai, Biarskur.
Ha katei ka sngi la ïadon u myntri ka tnad ïalehkai ka sorkar Jylla u Bah Wailadmiki Shylla kum u kongsan ha ryngkat ka jingïadonlang u District Sports Officer (DSO) ka West Jaiñtia Hills Bah Khroobok Passah kum u symbud kongsan, kumjuh u President WJDSA u Bah Lamat O Laloo bad kiwei kiwei.
Haba phai sha ka jingïakhun phainal jong ki shynrang, ka ATS-NEAU ka la pynliem noh ïa ka Madan Kynsaw ha ki saw set, katba ha ka liang ki kynthei la jop da ka ATS-Girls ïa ka ATG-Girls.
Haba ai jingkren ha katei ka sngi, u Bah Shylla U la ai ka jingïaroh ïa ka West Jaiñtia Volleyball Association kaba la pynlong ïa kane ka jingïalehkai bad pynshlur ïa ki paidbah ban ai ka jingkyrshan na ka bynta ki jingthmu ban sa wan, kynthup ïa ki lympung ïalehkai ha ki skul bad ki prokram ai jinghikai ïa ki rephri.
Shuh shuh u Bah Wailadmiki u la pynpaw ruh ïa ka polisi thymmai jong ka Sorkar Jylla na ka bynta ban thung kam ïa ki nongïalehkai kiba la wanrah nam ïa ka Jylla.
