Shillong, Rymphang 03
Ka kynhun ki ‘thei ïalehkai ka India ka la jop da 1-0 kol ïa ka kynhun ïalehkai na Germany, ka Hertha BSC Frauen ha ka jingïalehkai paralok kaba la long ha ka lah sngi U Blei ha ka S&B Sport Football Complex, Serik, Antalya, Türkiye.
Ka Grace Dangmei ka la thep ha ka minit kaba 37 ban pyntikna ïa ka jingjop ïa ka India, katba ka dangbteng ïa ka jingpynkhreh jong ka ha Türkiye hashwa ka AFC Women’s Asian Cup Australia 2026.
Ka India kaba la don ha Antalya kum shi bynta ban pynkhreh ïalade ban ïakhun ïa katei ka lympung bad kan dang bteng ïa ka jingkilan met ha Türkiye haduh ka taïew ba nyngkong mynta u bnai, hashwa ba kan pynkynriah jaka ïalehkai sha Perth, Australia. Ka India kan sdang ïa ka jingïalehkai ha ka Asian Cup pyrshah ïa ka Vietnam ha ka sngi Balang ha Perth Rectangular Stadium.
Ka India kan sa ïakhun sa ar tylli ki jingïalehkai paralok pyrshah ïa ka Zvezda-2005 Perm (Russia) ha ka sngi Balang ha kajuh ka madan ha Serik ha kaba yn bud sa ka jingïakhun bad ka FK Csikszereda Miercurea Ciuc (Romania) ha ka 7 tarik.
