Shillong, Rymphang 03
Ka Young Boys, Mawsawrit bad ka Mawlum Tyrsad SC ki la jam sha ka phainal ha ka lympung ïalehkai Third, Second bad First Division.
Ha ka jingïakhun semi final jong ka Third Division kaba la long ha ka sngi Ba-ar ha madan Mawlum kaba ha Tyrsad, ka Young Boys ka la pynliem noh ïa ka Niamsang SC da 1-0 kol bad ïa kane ka shi kol la thep da u Shemphang Khongsit ha ka minit kaba 19.
Kumjuh ha ka jingïakhun semi final jong ka Second Division, ka Mawsawrit SC kala pynliem noh ïa ka Pyndenumbri SC lyngba ka tie-breaker da 4-3 kol hadien ba kine ki kynhun kim shym la lah ban thep kol haduh kaba kut ka jingïalehkai.
Haba phai sha ka First Division, ka Tyrsad Mawlum SC ka la pynliem noh ïa ka Mawkynroh SC lyngba ka tie-breaker da 5-3 kol hadien ba kine ki kynhun kim shym la lah ban thep kol haduh bakut ka jingïalehkai.
Na ka liang ki bor pynïaid ka Tyrsad Area Sports Association (TASA) ka la pynbna ba ïa ki jingïakhun final jong baroh lai tylli ki kyrdan ïalehkai yn pynlong ha ka 7 tarik mynta u bnai.
Ha ka Third Division ka jingïakhun kan long hapdeng ka Mawsadang pyrshah ïa ka Young Boys ha ka por 10:30 mynstep, kumjuh ha ka Second Division ka Nongmadan kan ïakynduh pyrshah ïa ka Mawsawrit ha ka por 12 baje mynsngi bad ha ka First Division ka Umkaber pyrshah ïa ka Mawlum Tyrsad ha ka por 2 baje nohphai sngi.
