Shillong, Rymphang 03
Ka Kerala, Punjab, Services bad ka Railways ki la jam sha ka semi final ha ka wat ba khatduh jong ka 79th National Football Championship na ka bynta ka Santosh Trophy 2025-26, hadien ba ki la khur jingjop ha ka sngi Ba-ar ha Dhakuakhana bad ha Silapathar, Assam.
Kine ki jingïakhun semi final kin long ha ka 5 tarik mynta u bnai ha kaba ka Services kan ïakynduh pyrshah ïa ka Railways ha Silapathar Football Stadium, katba ka Kerala ïa ka Punjab ha Dhakuakhana Football Stadium. Ïa kine ki jingïalehkai yn pynlong ha ka por 1:30 mynsngi.
Haba phai sha ki jingïalehkai quarter final, ka Kerala ka la pynliem noh ïa ka Assam da 3-0 kol. Ïa kine la thep da u Manoj M ha ka minit kaba 17, kumjuh u Muhammed Ajsal (44) bad u Aboobacker Dilshad (90+2).
Ka Services ka la pynliem noh ïa ka lahduh jong u snem ba la lah, ka West Bengal lyngba ka tie-breaker da 3-2 kol hadien ba kine ki kynhun kim shym la lah ban thep kol haduh kaba kut ki 120 minit.
Ka Punjab ka la pynliem noh ïa ka Tamil Nadu lyngba ka tie-breaker da 4-1 kol hadien ba kine ki kynhun ki la ïakhaid mar 1-1 kol.
Haba phai sha kawei pat ka jingïakhun ka Railways ka la jop da 2-0 kol ïa ka Rajasthan. Ïa kine la thep da u Saurabh Bhanwala ha ka minit kaba 78 bad u Johnson Joseph Mathews (83).
