Shillong, Rymphang 03
Ka nongkiew lum na India ka Kabak Yano kaba na Arunachal Pradesh ka la lah ban poi shakliar u lum Aconcagua ha Argentina bad une u lum u long uba jrong tam ha South America uba jrong kumba 22,831 phut.
Kane ka jingjop ka dei kum shi bynta jong ka 7-Summit Mountaineering Expedition. Na ka liang u Lat jong ka jylla Arunachal Pradesh U Lt. Gen. K.T. Parnaik u ba la shongthait u la ai khublei ïa katei ka nongkiew lum kaba dang 27 snem ka rta, ha kaba u la ïaroh ïa ka jingshlur, ka jingtrei shitom bad ka jingïaid lynti kaba ai mynsiem lang ïa kiwei pat.
