Jowai, Rymphang 03
U Myntri ka tnad ïalehkai ka Sorkar Jylla bad uba long ruh u MLA ka Jowai, u Bah Wailadmiki Shylla u la pynbna ba la dep ban khot tender na ka bynta ban maramot pynbha ïa ka madan Kiang Nangbah Stadium ha ka jinglut kaba T. 16 klur tam.
Ïa kane u Myntri ula pynbna haba kren kum u kongsan ha ka phainal jong ka ’17th U Kiang Nangbah Memorial Tro-phy-Super Division Foot-ball Tournament” ba la pynïaid da ka West Jaiñtia District Sports Associa-tion ha ka sngi Saitjaiñ ha Kiang Nangbah Stadium, Jowai.
“Kane ka jingmaramot pynbha ïa ka madan ka kynthup naduh ka jingbujli thymmai ïa u plastik ne artificial turf, ka athletic track, ka jaka shong ki nongshah khot sngewbha ne ka VIP gallery bad ka jingker ïa baroh sawdong katei ka stadium,” la bynrap u Myntri.
Haba ïadei bad ka jaka shong ki paidbah nongpeitkai, u Bah Shylla ula ong ba la dep ban mang T. 6 klur tam. “Ha ka jingshisha ka kam ka la dei ban ïaid noh shaid shaid, hynrei namar bym ïoh ban pynlong ïa ka phainal Super Division ka kam ka la sahteng.”
U la ong ba watla katta ula pynthikna ba ka jingpyntrei ïa ka gallery ha Kiang Nangbah Stadium kan sdang noh shen.
Te kumta u la khot ruh ka jingïatreilang jong baroh khamtam haba ka Jylla kan pdiang ïa ka National Games ha u snem 2027 bad pynbna ruh ba ha kane ka lympung bah jong ka ri, lai tylli ki jingïalehkai yn pynlong ha nongbah Jowai.
Shwa kane u Bah Wailadmiki Shylla ula pynbna ba ka aïom tlang yn sdang ïa ka ‘Jowai Winter Games’ ha kaba baroh ki shnong hapoh ka 2-Jowai Constituency kin ïashim bynta ha ki jingïa-lehkai bapher bapher bad u khmih lynti ba lyngba kane ka rynsan yn mih shibun ki khynnah bad samla don sap na kane ka thaiñ.
