Shillong, Rymphang 04
Ka Dorbar Shnong Golflink ka la maham da kaba tyngeh ban khang lynti shi syndon ïa ki heh ki haiñ ban rung sha Jawaharlal Nehru Sports Complex (JNSC), Polo, lada ïa ka jingeh kaba la slem bha jong ka jingshlei um bad ka jinglang um ha katei ka jaka ym lah ban leh eiei da ki bor ba dei khmih jong ka tnat ïalehkai.
Kane ka jingmaham ka long hadien ba ki dkhot ka Dorbar Shnong, ha ryngkat ki ophisar na ka tnad Public Works Department (PWD) bad ka State Sports Council, ki la pynlong ïa ka jingjurip ïa katei ka jaka ha ka sngi Ba-ar.
Ïa kane ka jingleit jurip la pynlong katkum ka jingbthah da u Myntri ka tnad ïalehkai u Bah Wailadmiki Shylla, hadien ki jingujor kiba la wanrah da ki nongshong shnong katei ka thaiñ.
Lah ban kdew ba ha ka lah sngi U Blei, ki nongmihkhmat jong ka Dorbar Shnong ki la leit ban ïakynduh ïa u Myntri ka tnat ïalehkai ban pyntip ha u halor ka jingjia shlei um kaba khah khah kaba la ktah ïa ki longïing ha katei ka thaiñ ha ka por slap.
“Kane kan dei ka jingjurip kaba khatdduh, lada ym lah ban leh eiei mardor, ngin hap ban pakhang syndon ïa ka surok kaba ki heh ki haiñ ne ki VVIP ki pyndonkam ban rung shapoh ka JNSC”, la pynpaw u Rangbah ka Golflink Shnong u Bah Michael Hek.
Kham hashwa na ka liang ka Dorbar Shnong ka la aiti da ki jingthoh halor ka jingkhanglad ïa ka jingtuid jong ka um, kaba la pynlong ïa ka jingshlei um bad ka jinglang jong ka um ha ki bynta ba sah ki briew jong katei ka thaiñ.
U Bah Hek u la ong ba wat hapdeng ki jingïakynduh bad jingpynthikna bunsien ha ki por ba la dep, hynrei ka tnat ba dei khmih kam shym la shim khia ïa katei ka jingeh kaba kum ki nongshong shnong katei ka thaiñ ki ïakynduh manla ka por.
Ha ka jingïalang bad ki nongshong shnong, la ïathuh ba u Myntri ka tnad ïalehkai u la ïakren bad u Chief Engineer bad bthah ïa u ban pynlong ïa ka jingjurip kyrkieh, khamtam leilei ka Jylla kan pdiang ïa ka National Games ha u snem 2027.
Katkum ka jingpynpaw da ka Dorbar Shnong, ka jaka pyntuid um ha katei ka jaka kam shym la treikam shuh la kumba katto katne snem, kaba pynlong ban dap um ha ki ïing ki sem kiba ha katei ka thaiñ ha ka por ba jur slap. Te kumta ki nongshong shnong ki la maham ba ka jingbym leh ei ei kan pynlong ïa ki ba kin nym don lad shuh, hynrei ban khanglad shi syndon ïa ka surok VIP.
“Ngi la ap mynta la ar snem, kane ka dei ka jingjurip kaba khatduh, lada ka sorkar kam leh eiei, ngin sa shim ïa ki lad ki lynti, kynthup ban khang ïa ka surok VVIP”, la pynpaw ka Dorbar Shnong.
U Rangbah Shnong u la pynshai ba na ka liang ka Dorbar Shnong ka ju ai ka jingïatreilang bad ka Sorkar ha ki por ba don ki jingïalang kiba heh kum ka tamasa Cherry Blossom bad kiwei kiwei ki prokram, bad kam ju don kano kano ka jingeh. Hynrei ka la ban jur ba ka jingïatreilang ka dei ban don ka jingïasngewthuh jingmut.
“Kane kam dei shuh ka mat kaba rit ha kane ka thaiñ. Ngim kwah ban buh jingma ïano ïano ne ban pynthohbria ïa ka tnad ïalehkai”, la bynrap u Bah Hek da kaba bynrap ba ïa ka shithi la dep aiti ka shithi sha u Myntri Rangbah ka Jylla, hynrei kam shym la don kano kano ka jubab kaba pynhun ïa ki nongshong shnong.
Ha kawei pat ka liang u Assistant Rangbah Shnong ka Golflink u Bah S.M. Lyngdoh u la kdew ba katto katne ki hostel bad ki ïing ki la mih hapoh ka JNSC, kaba buh ïa ka jingma lada ym lah ban tehlakam na ka jingshlei um.
“Lada jia biang ka jingshlei um, ka pisa paidbah kan shu jah rngai bad ki briew kin mad ïa ka jingduhnong, shwa ban jia kino kino ki jingjia ba sngewsih, ngi kwah ba ki bor ba dei khmih kin leh eiei”, u la bynrap.
U Bah Lyngdoh u la bynrap ruh ba ka jingpynkhuid bad ka jingpynbeit ryntih ïa ki lynti ïaid ha katei ka jaka kan ailad ïa ka um ban tuid beit sha ka wah Umkhrah bad kan ym don noh kano kano ka jingshlei um ha katei ka thaiñ.
U la pynkynmaw ruh ïa ki jingjia kiba la dep jong ka jingshlei um kaba jur ha ka por ba ka Sports Authority of India (SAI) ka dangtreikam ha JN Complex, ha kaba ka um ka la kiew shi rynïeng briew.
U Bah Lyngdoh u la pynpaw biang ba ki jingdawa jong ka shnong ki long tang na ka bynta ka jingshngaiñ bad jingbha jingmiat jong ki paidbah, bad ka la kyntu ïa ka tnat ba dei khmih ba kan shim khia khnang ba kan ym wanrah ka jingeh ïa ki nongshong shnong.
