Nongstoiñ, Rymphang 04
Ka shlem treikam jong ka District Sports Officer (DSO), West Khasi Hills District ha ka sngi Balang ka la pynkut noh ïa ka lympung ïalehkai Kho-Kho bad Kabaddi hapoh ka Rural Sports Programme 2025-26 ïa kaba la pynlong da ha madan ïalehkai NDSA, Nongpyndeng.
Ha kane ka lympung ki la don haduh 83 ngut ki nongïashim bynta kiba la ïashim bynta, da ka jingthmu ban kyntiew ïa ka jingïalehkai bad ka jingkilanmet hapdeng ki samla jong ka district.
Ha kane ka sngi ka Nonglang Pungsier Sports and Cultural Club ka la jop ïa ka Kabaddi ha ka liang ki kynthei bad ka JNV Nongstoiñ ka la wan ha ka kyrdan ba-ar.
Ha ka jingïalehkai Kabaddi jong ki shynrang, ka Siejlieh Sports and Cultural Club ka la rah ïa ka nam lahduh bad ka JNV ka la wan ba-ar.
Ha ka Kho-Kho Kynthei, ka JNV ka la rah ïa ka nam jop, bad ka Nonglang ka la wan ba-ar bad ha ka Kho – Kho ki shynrang, ka Siejlieh Sports and Cultural Club ka la rah ïa ka nam jop, katba ka JNV ka la wan ha ka kyrdan kaba ar.
Ka thong jong kane ka prokram ka long ban kyntiew ïa ka kam ïalehkai hapoh ka District
Shuh shuh ha kane ka sngi u Bah E. Lyngdoh, A.C. BDO Nongstoiñ Block, u la long u kongsan, bad u la sam ruh ïa ki khusnam sha ki nongjop ha ryngkat ka jingdonlang ka District Sports Officer bad kiwei ki riew rangbah kiba la shah khot sngewbha.
