Shillong, Rymphang 04
Ka lympung ïalehkai Under-14 Football League 2026 ba la pynïaid da ka Shillong Sports Association (SSA) ka la jam sha ka semi final ha kaba ka Mawkhar SC, Umphyrnai SC, Langsning FC bad ka Nongthymmai Nongkynrih SC kin ïakhun pyrshah ha ka sngi Palei na ka bynta ban ïaknieh ban ïoh rung sha ka final.
Ha ka jingïalehkai quarter final kaba la long ha ka sngi Balang ha SSA Stadium Polo, ka Mawkhar SC ka la pynliem noh ïa ka Shillong Lajong FC lyngba ka tie-breaker da 3-2 kol hadien ba kine ki kynhun kim shym la lah ban thep kol haduh kaba kut ka jingïalehkai.
Ka Umphyrnai SC ka la pynliem noh ïa ka Lumshyiap SC da 3-1 kol. U B.Kharkongor u la thep ar kol ha ka minit kaba 17 & 56, katba ïa kawei pat la thep da u D.Kharkongor (44). Na ka liang ka Lumshyiap ka la pynkhih jar kham hashwa lyngba u E.Pale (9).
Ka Langsning FC ka la pynliem noh ïa ka Pay For Right F.A da 7-0 kol. U N.Mukhim u la khur ïa ka hat-trick hadien ba u la ïoh ban thep ha ka minit kaba 7, 15 & 56. Kumjuh u D.L Nongbri u la thep ar kol ha ka minit ka 36 & 38, katba ïa kiwei pat la pynbud da u L.Khardewsaw (12) bad u E.Mynsong (59).
Ha kawei pat ka jingïalehkai quarter final kaba khatduh, ka Nongthymmai Nongkynrih SC ka la jop da 2-1 kol ïa ka Pynthorbah SC.
Ha kane ka jingïakhun ka Pynthorbah ka la pynkhihjar nyngkong ha ka minit kaba 4 lyngba u N.Hoojon, hynrei ka Nongthymmai Nongkynrih ka la pynphai kylla ar kol lyngba u B.Dkhar ha ka minit kaba 18 bad u B. Nongrum (53) na ka bynta ban khur syndon ïa ka jingjop.
