Shillong, Rymphang 04
Ka kynhun ki ‘thei ïalehkai U-17 jong ka India ka la pynliem noh ïa ka Bhutan da 8-0 kol ha ka jingïakhun ba khatduh jong ka SAFF U19 Women’s Championship 2026 ha ka sngi Balang ha Pokhara Rangasala Stadium.
Ka Pearl Fernandes ka la khur ïa ka hat-trick kaba nyngkong eh da kaba thep ha ka minit kaba 16, 39 & 41. Katba ka Pritika Barman (25 & 90) ka la thep ar kol, katba ka Alisha Lyngdoh ka la long ka nongthep kol kaba nyngkong ha ka minit kaba 6, kumjuh ka Abhista Basnett (10), bad ka Divyani Linda (17).
Lyngba kane ka jingjop ka India ka la lah ban pynthikna ban jam sha ka final ha ka SAFF U19 Women’s Champion-ship 2026, hadien ba ka Bangladesh ka la jop ïa ka Nepal da 4-0 kol ha kawei pat ka jingïakhun hynne ka sngi.
Te kumta ka India ka la wan ha ka kyrdan ba-ar ha kaba ka la kamai 6 poiñ na ki lai sien ïakhun, da kaba ka la duna da 3 poiñ ïa ka Bangladesh, kaba lamkhmat ha kane ka lympung. Ka Nepal ka la wan ha ka kyrdan balai bad kamai 3 poiñ, katba ka Bhutan ka la wan ha ka kyrdan ba shatrai bad kam shym la lah ban kamai wat tang shi poiñ ha kane ka lympung.
Lah ban kdew ba ha kane ka jingïakhun kaba khatduh, ka ‘thei ïalehkai ka Jylla ka Alisha Lyngdoh ka la ïoh ban mih madan nuduh kaba sdang kane ka jingïakhun haduh kaba kut.
