Shillong, Rymphang 05
Ha ka sien kaba nyngkong eh ka Sports Authority of India (SAI) Training Centre Shillong, kan pynrung khynnah ha ka jingïalehkai kaba dangthymmai ha ka Jylla kata ka Sepaktakraw.
Kane ka prokram jied kan long na ka bynta ki khynnah shynrang kiba naduh 12 snem haduh 18 snem ka rta kat haduh ka 01-02-2026, ki ban hapoh ka ‘Residential scheme’ ka ban long ha ka 19 bad 20 tarik mynta u bnai ha katei ka shlem ai jinghikai kaba don ha NEHU.
Ka jingjied ïa ki sap ïalehkai ki khynnah ka long katkum ka jinglah ban pynpaw ïa ka jingtbit bad kiba la ïoh jingjop ha kino kino ki lympung ïalehkai la ka long ha ki International, National, State & Distrik bad lyngba ka jingpynlong ïa ki test katkum ka rta jong ki.
Te kumta katkum ka kyrwoh ba la pyllait da u Assistant Director ka SAI, STC, Shillong u Rajnish Kumar Mishra, la ong ba ki khynnah ki dei ban wanrah lang ïa ki dur passport size bad ki Aadhaar card lem bad ki kot ki sla ki ban pynshisha ïa ka snem kha.
La bthah ba ki khynnah ki dei ban pyni ruh ïa ka jingpynshisha ïa ka jingkoit jingkhiah na u doktor ba la ïoh jingithuh ha ka por ba wan sha katei ka jingpyrshang.
